Túrkistan oblysy shekara mańyndaǵy aýyldar joǵary jyldamdyqty ınternetke qosyldy
TÚRKІSTAN. KAZINFORM – Túrkistanda oblys turǵyndaryn joǵary jyldamdyqty ınternetpen qamtý baǵytynda jınalys ótti.
Atalǵan baǵytta «Qazaqtelekom» baılanys operatorynyń seriktesi «OK Telecom» JShS ókilderi men Túrkistan oblysy tsıfrlandyrý, memlekettik qyzmetter kórsetý jáne arhıvter basqarmasy mamandary arasynda kelissózder júrgizildi.
Qos taraptyń kelisimi boıynsha búginde Saryaǵash aýdany Dostyq-2 shekara aýmaǵynda ornalasqan eldimekender joǵary jyldamdyqty ınternetpen qamtyldy.
«Oǵan qosa Yntymaq, Bostandyq, Eńkes, Derbisek eldi mekenderin úı jaǵdaıyndaǵy joǵary jyldamdyqty ınternetke qosý jumystary júrgizilýde. Bul óz kezeginde, aýyl turǵyndaryna qashyqtan oqýǵa, jumys jasaýǵa jáne zamanaýı tsıfrlyq tehnologııalardyń barlyq artyqshylyqtaryn paıdalanýǵa múmkindik beredi», — dep jazdy jergilikti ákimdikten.
Oblys aýmaǵyndaǵy aýyldyq eldi mekenderdi sapaly ınternetpen qamtý jol kartasyna sáıkes, Saryaǵash aýdany boıynsha Ksell uıaly baılanys operatorynyń 5 bazalyq stantsııasyn jáne Bılaın uıaly baılanys operatorynyń 16 bazalyq stantsııasyn ornatý jumystary júrgizilýde. Osy rette jańa bazalyq stantsııa ornatýǵa turǵyndar tarapynan týyndaǵan radıofobııa máselesi eldi mekenderdi tolyqqandy jospar boıynsha mobıldi ınternetpen qamtylýyna kedergi keltirýde. Osyǵan baılanysty oblys turǵyndaryn túsinistikpen qaraýǵa shaqyramyz!
Aıta keteıik, Saryaǵash aýdany boıynsha, «OK Telecom» baılanys jelisine Yntymaq aýylynan 155 abonent, Bostandyq — 85 abonent, Dostyq 1.2 — 130 abonent, Eńkes — 120 abonent, al Derbisek eldi mekeninen — 35 abonent qosyldy.
