Túrkistan oblysy: shegirtkeni joıý jumysyn júrgizýge tehnıka tapshy

ASTANA. KAZINFORM - Qazyǵurt aýdandyq fermerler qaýymdastyǵynyń tóraǵasy Eráli Áshir «Jibek joly» telearnasyndaǵy «JJ TALK Erbolat Muhamedjanmen» baǵdarlamasynda shegirtkege qarsy qoldanylyp jatqan preparattardyń sapasyz ekenin aıtty. 

«Preparattardy shashyp bolǵannan keıin, biraz kún ótken soń shegirtke qaıtadan kúsheıip ketti. Shashyp ketken jerlerdegi shegirtkeler tolyq joıylmaǵan. Bul preparattardyń álsizdigi me, sapasyzdyǵy ma – belgisiz. Óńdeý jasalǵan jerlerde qaıtadan kúsheıip ketti. Úlken alqapqa jaıylyp ketti. Biraz fermerlerdiń astyq alqaptaryn joıyp ketip jatyr», - deıdi sharýa.

Sondaı-aq, onyń aıtýynsha shegirtkemen kúreske bólingen tehnıkalardyń jaǵdaıy óte nashar jáne sany az.

«Olar sharýalardan úlgermeı jatyrmyz dep tehnıka suraıdy. Sizder tehnıka bólindi dep jatsyzdar, al myna jaqta sol tehnıka kórinbeıdi. Shaqyrǵan jerge bir ǵana ýazık keledi, onyń ózi júrmeıdi. Buzylyp-buzylyp áreń júredi», - deıdi Qazyǵurt aýdandyq fermerler qaýymdastyǵynyń tóraǵasy.

Baǵdarlamaǵa qatysqan QR AShM AÓK Memlekettik ınspektsııa komıteti tóraǵa orynbasary Muhtar Alıev bul máseleni óz baqylaýyna alatynyn aıtyp sendirdi.

«Biz búgingi tańda tıisti tehnıkany jetkizýge tyrysyp jatyrmyz. Degenmen bundaı aqparattar bolsa, bizge aıtyńyz. Erteń ózim habarlasyp, ne sebepten osylaı bolyp jatqanyn suraıyn. Búgingi tańda ol jerde bizdiń vıtse-mınıstrimiz, komıtet tóraǵasy bar, sol jerde júr qazir. Biz anyqtaımyz bul máseleni», - dedi mınıstrlik ókili.

Aıta ketý kerek, bıyl Úkimet shegirtke zııankesterimen kúresýge bıýdjetten 8,1 mlrd teńge bóldi.