Túrkistan oblysy Kentaý qalasynda jumysshy mamandar daıarlaıtyn biregeı oqý orny bar
TÚRKІSTAN. KAZINFORM — Kentaý qalasynda jumysshy mamandar daıarlaıtyn Kentaý polıtehnıkalyq kolledji bar. Oqý orny 2011 jyly Kentaý transformator zaýytynyń negizinde qurylǵan. Sondaı-aq, «Alageum Electric» kompanııasynyń qurylymdyq bóligi. Búginde kolledj qabyrǵasynda 11 mamandyq boıynsha 800-den astam stýdent bilim alady. Búgin jumysshy mamandyqtar jyly aıasynda atalǵan kolledjde BAQ ókilderine arnalǵan baspasóz týry ótti.
Týr aıasynda jýrnalıster oqý ornyndaǵy elektroenergetıka, avtomattandyrý, IT, mehatronıka, jańartylatyn energııa kózderi jáne 3D-modeldeý baǵyttaryndaǵy sheberhanalaryn aralady. Sonymen qatar kolledj ǵımaratynda jańa tehnıkalyq qural-jabdyqtarmen qamtamasyz etilgen oqý kabınetterine bardy. Onda stýdentterdiń ınnovatsııalyq jobalarymen tanysty. Kabınetter kompıýterlermen, ınteraktıvti taqtalarmen qamtamasyz etilgen. Kolledj kitaphanasynda zamanaýı jalpy tehnıkalyq, salalyq jáne kórkem ádebı oqýlyqtardyń 13 myńǵa jýyq qory bar.
Budan bólek, negizgi quraldardyń biri – «Smartnation» platformasy. Bul – stýdentter men oqytýshylar úshin ashyqtyq pen yńǵaılylyqty qamtamasyz ete otyryp, oqý protsesin avtomattandyrýǵa múmkindik beredi.
Tilshiler baspasóz týry aıasynda «Kentaý transformator zaýyty» AQ óndiristik alańyna baryp, elimizdiń jetekshi kásiporyndarynda eńbek etip júrgen túlektermen kezdesti. Óndiris ornynyń basty ereksheligi – ónimderin zamanaýı qondyrǵylar negizinde jasap shyǵarady. Kolledjde oqý protsesiniń alǵashqy kúnderinen-aq stýdentterge zaýyttyń óndiristik oryndarynda tájirıbeden ótýge múmkindik beriledi. Nátıjesinde stýdentter bir mezgilde teorııalyq ári praktıkalyq bilim alady. Qazir kolledjdi 2 myńǵa jýyq túlek támamdap, túrli kásiporyndar men uıymdarda jumys istep júr.
Aıta keteıik, atalǵan oqý orny Qazaqstandaǵy TOP-10 úzdik kolledjderdiń qatarynda. Bilim ordasy Túrkistan oblysynyń bilim berý salasyndaǵy jetekshi oqý oryndarynyń biri.
Onda óndiris, ınnovatsııa jáne tájirıbege baǵyttalǵan oqytý júıesi tıimdi júzege asyrylady. Kolledj energetıka, mashına jasaý, IT, jańartylatyn energııa kózderi jáne basqa da salalarda joǵary suranysqa ıe mamandardy daıarlaıdy.
Aıta keteıik, Túrkistan – ajyrasý deńgeıi eń tómen óńir.
