Túrkistan oblysy et eksporty boıynsha Qazaqstanda kóshbasshy

TÚRKІSTAN. KAZINFORM — Túrkistan oblysynda avstralııalyq mal sharýashylyǵy ádisin qoldanatyn bes joba júzege asyrylyp jatyr. Bul týraly QR AShM baspasóz qyzmeti málim etti.

Óńirde avstralııalyq mal sharýashylyǵy ádisi boıynsha jalpy quny 55,2 mlrd teńgeni quraıtyn bes iri ınvestıtsııalyq jobany iske asyrý josparlanyp otyr.

Onyń ishinde «Kaıyp Ata» JShS-niń úsh ınvestıtsııalyq jobasy bar.

Máselen, 2025 jyly Arysta kompanııa 25 myń bas iri qara mal bordaqylaý keshenin iske qosady. 2025-2026 jyldary Saıram aýdanynda qýattylyǵy 1500 bas iri qara mal soıý jáne óńdeý kesheni men mal bırjasy iske qosylady.

«Óńir et eksporty boıynsha Qazaqstanda kóshbasshy bolyp tabylady, oblys úlesine eksporttalatyn ІQM etiniń 80% jáne qoı etiniń 75% tıesili. Aǵymdaǵy jyldyń jeti aıynda 6,9 myń tonna sıyr eti men 4,7 myń tonna qoı eti eksporttaldy», — delingen habarlamada.

«Týran Agro Et-Sýt» jáne «Kaıyp Ata» iri kásiporyndary etti Ózbekstanǵa, Iranǵa jáne Tájikstanǵa eksporttaıdy.

Atap aıtqanda, «Kaıyp Ata» Tájikstanmen 110 tonna et eksportyna kelisimshart jasasty, jetkizilim bastaldy.

Aıta keteıik, Túrkistan oblysynda 1,1 mln bas iri qara, 5,3 mln qoı, 474,7 myń jylqy, 43,9 myń túıe jáne 2,2 mln bas qus bar. Jeti aıda oblysta 112,8 myń tonna et, 280,2 myń tonna sút jáne 143,6 mln jumyrtqa óndirildi.

Oblysta ІQM úshin 9183 bordaqylaý alańy jumys isteıdi, onyń ishinde syıymdylyǵy 400-den 1000 basqa deıingi 13 alań jáne syıymdylyǵy 1000 basqa deıingi 22 alań.

Eske sala keteıik, buǵan deıin Tájikstanǵa alǵash ret Túrkistan oblysynan 16 tonna iri qara mal eti eksporttalǵanyn jazǵan bolatynbyz.