Túrkistan oblysy ekonomıkasyna tartylǵan ınvestıtsııa kólemi artty
Túrkistan oblysynda ınvestıtsııa tartý, ındýstrııalandyrý jumystaryna basymdyq berilip otyr. Bul týraly Ortalyq kommýnıkatsııalar qyzmetiniń alańynda oblystyń áleýmettik-ekonomıkalyq damýy týraly esep berý barysynda oblys ákimi Darhan Satybaldy málim etti, dep habarlaıdy Kazinform.
«Bıylǵy 10 aı qorytyndysy boıynsha oblystyń áleýmettik-ekonomıkalyq damýynyń oń ósimi saqtaldy. Jalpy óńirlik ónim kólemi 3 trln teńgeden asty. Al ónerkásip ónim kólemi esepti kezeńde 2% artyp, jalpy 758 mlrd boldy. Aımaqta zaýyttar salý, ınvestıtsııa tartý jumystaryna basymdyq berilgen. Sheteldik iri kompanııalarmen kelissózder turaqty ótip jatyr. Taıaý jyldary óńirde iri kásiporyndar jumysyn bastaıdy. Sol baǵytta bar kúsh-jigerimizdi salamyz», – dedi Darhan Satybaldy.
«Qazatomónerkásip» UAK» AQ ýran óndirýshi kompanııalardyń suranysyna sáıkes, Sozaq aýdanynda kúkirt qyshqylyn óndiretin zaýyt salý josparlanyp otyr. Jobanyń ınvestıtsııalyq quny – 100 mlrd teńge. 250 jańa jumys orny ashylady. Búginde zaýyt qurylysyna qajetti jer ýchaskesi bólindi. Kompanııa tarapynan tehnıkalyq-ekonomıkalyq negizdemesi ázirlenip jatyr.
Óńirdiń ónerkásiptik áleýetin damytýǵa múmkindik beretin birneshe mańyzdy jobalardy iske asyrý josparlanyp otyr. Óńdeý ónerkásibinde jalpy quny 30,2 mlrd teńge bolatyn 20 joba iske asyrylyp, 594 jumys orny ashylady dep josparlanǵan. Búginde 384 jańa jumys ornymen jalpy quny 11 mlrd teńge 10 joba iske qosyldy. Bul baǵytta jumystar jalǵasady. Óńirde iri jobalardy iske asyrý esebinen ózindik kiristerdi aldaǵy 5 jylda qosymsha 100 mlrd teńgege kóbeıtý kózdelip otyr. Sondaı-aq óńdeý ónerkásibinde 20 jobany júzege asyrý josparlansa, búgingi tańda 10 joba iske qosyldy (11 mlrd teńge, 384 jumys orny).
Oblys ekonomıkasyna tartylǵan ınvestıtsııa kólemi 1,4 ese artyp, 751 mlrd teńgeden asty. Tikeleı sheteldik ınvestıtsııalar kólemi 225,3 mln AQSh dollaryna jetti. Jalpy quny 3,3 trln teńge bolatyn 194 ınvestıtsııalyq jobalardyń pýly qalyptasty. Olar 2023-2026 jyldar aralyǵynda iske qosylyp, 16 467 jumys orny ashylady dep josparlanyp otyr. Bıyl 51 ınvestıtsııalyq jobany iske asyrý josparlanyp, jyl basynan 39 joba iske qosyldy. 1230 jumys orny ashylǵan.
