Túrkistan oblysy ákimdigi jeti mınýttyq beınerolıkke 100 mln teńge tólemek
TÚRKІSTAN. KAZINFORM — Túrkistan oblysy mádenıet basqarmasyna qarasty «Uly Dala Eli» ortalyǵy 100 mln teńgege tikeleı shart jasasý arqyly «G7 Exlusive» JShS-ne 3-7 mınýttyq tarıhı beınerolıkke tapsyrys bergen.
Túrkistan oblysy mádenıet basqarmasynyń málimetinshe, oblystyq memlekettik satyp alý basqarmasy atalǵan jobany satyp alýdy ashyq konkýrs tásilimen uıymdastyryp, 2025 jylǵy 25 maýsym men 2 shilde aralyǵynda ótinim qabyldaǵan.
Nátıjesinde konkýrsqa qatysýǵa birde-bir áleýetti qatysýshy jiberilmeýine baılanysty 8 shilde kúni ótpegen dep tanylǵan. «Aqparattyq júıelerdi kontentti toltyrý jáne moderatorlaý qyzmetterin» ekinshi ret ashyq konkýrs tásilimen 2025 jylǵy 21-28 tamyz aralyǵynda ótinimderdi qabyldaı otyryp ótkizilip, 29 qyrkúıekte konkýrsqa qatysýǵa bir áleýetti qatysýshy jiberilýine baılanysty ótpedi dep esepteldi.
Atalǵan jobany úshinshi ret ashyq konkýrs tásilimen satyp alý úshin 2025 jylǵy 8-14 qazan aralyǵynda ótinimder qabyldanǵan. Qorytyndylar týraly hattamaǵa sáıkes konkýrsqa qatysýǵa bir áleýetti qatysýshy jiberilýine baılanysty 17 qazanda ótpegen dep tanyldy.
— Osyǵan oraı, 3 ret ashyq konkýrsqa jiberilip ótpegenin eskere otyryp jáne bólingen qarjyny tıimdi ári ýaqytyly ıgerý maqsatynda atalǵan jobany QR «Memlekettik satyp alý týraly» Zańynyń 16-baby 3-tarmaǵyna sáıkes bir kózden alý tásilimen 2025 jylǵy 28 qarashada qosymsha qun salyǵyn qosa alǵanda 100 800 000 teńgege kelisimshart jasalyndy. Tapsyrys berýshi — Túrkistan oblysy mádenıet basqarmasyna qarasty «Uly Dala Eli ortalyǵy». Oryndalý merzimi 2025 jyldyń 31 jeltoqsanyna deıin, — delingen oblystyq mádenıet basqarmasy usynǵan aqparatta.
Budan buryn Túrkistan oblysynda memsatyp alýda 8,2 mlrd teńgege negizsiz 263 kelisimshart túzilgenin jazǵan edik.