Túrkistan oblysy: 90%-dan astam jerge marokko shegirtkesine qarsy ý sebildi
ASTANA. KAZINFORM - Túrkistan oblysyna jumys sapary barysynda vıtse-premer Serik Jumanǵarın shegirtkege qarsy jappaı óńdeý jumystary júrgizilip jatqan aýdandardyń egis alqaptaryn aralap kórdi, dep habarlaıdy QR Úkimetiniń baspasóz qyzmeti.
Túrkistan oblysy egistik alqaptar kólemi boıynsha elimizdegi top-3 aımaq qataryna kiredi. Óńir birinshi bolyp shegirtkeniń eń qaýipti túri – marokko shegirtkesine qarsy belsendi kúres kezeńin bastady.
Barlyǵy 272 myń gektar jer óńdeledi. Onyń 252 myń gektary 19 mamyrǵa deıin óńdeldi, bul óńdeý jumystary josparlanǵan jerdiń 93%-y. Qalǵan 20 myń gektarda taıaý kúnderi óńdeý jumystary aıaqtalady.
Óńirdegi úlken alqaptardy óńdeý jumystaryna 360-tan astam adam tartylǵan. Olardyń qatarynda Túrkistan jáne basqa da oblystardyń aýdan-qalalarynan kelgen ınspektorlar, mamandar, boljaý ortalyǵynyń qyzmetkerleri, sondaı-aq máselege beıjaı qalmaǵan jergilikti turǵyndar da bar. Jumystar jaıaý, kólikte, ushaqtar men drondar arqyly júrgizilip jatyr. Barlyǵy 162 myń ga jerden, 107 myń ga aýadan, 1 myń ga rıýkzak túrindegi búrikkishpen, 1,4 myń ga drondar arqyly óńdelýde.
Serik Jumanǵarın shegirtkege qarsy óńdeý mehanızmderi men ádisterin zerttep, zııankesterge qarsy jumystardyń barlyq tsıklin júrgizetin merdigerlermen preparattardy jetkizý, saqtaý jáne óńdeý jumystary jóninde pikir almasty.
Eske sala keteıik, Túrkistan oblysynda búkil qyzmet tsıklin bir merdigerdiń kórsetýi pılottyq joba retinde synaqtan ótip jatyr. Keler jyly respýblıka boıynsha shegirtkege qarsy kúres qyzmetterin ortalyqtandyrylǵan biryńǵaı júıede satyp alýǵa kóshý josparlanýda.
