Túrkistan men Shymkentte 48 adam raqymshylyqpen bostandyqqa shyqty

TÚRKІSTAN. KAZINFORM — Raqymshylyqqa ilikkender otbasymen qaýysha bastady. 

Qazaqstan Respýblıkasy Konstıtýtsııasynyń 30 jyldyǵyna oraı jarııalanǵan raqymshylyq aıasynda Shymkent qalasy jáne Túrkistan oblysy boıynsha QAJ departamentine qarasty mekemelerde jazasyn ótep jatqan birqatar azamattarǵa qatysty izgilikke negizdelgen sheshim qabyldandy.

QAJ departamentiniń málimetine sáıkes, óńirdegi túzeý mekemelerinde jazasyn ótep jatqan 675 sottalǵannyń jeke is-materıaldary zerdelenip, raqymshylyqqa ilikti. Onyń ishinde 649 adamǵa qatysty jaza merzimi qysqartýǵa usynylsa, 52 adam tolyqtaı bosatýǵa jatatyny anyqtaldy.

Sot organdaryna 381 adamnyń is-qujaty joldanyp, qazirgi tańda 72 isti qaraý aıaqtalǵan. Nátıjesinde 48 sottalǵan azamat bostandyqqa shyǵyp, 14 adamnyń jaza merzimi qysqartyldy.

— Raqymshylyq sharasy ómirlik qıyndyqqa tap bolyp, taǵdyr taýqymetin tartqan azamattarǵa qoǵamǵa qaıta beıimdelýine, óz ómirin qaıtadan durys arnaǵa burýyna múmkindik beredi, — dep atap ótti Shymkent qalasy jáne Túrkistan oblysy boıynsha QAJ departamenti bastyǵynyń orynbasary, ádilet podpolkovnıgi Nurlybek Álibekuly.

Aıta keterligi, raqymshylyq aıasynda Shymkent qalasyndaǵy № 78 túzeý mekemesinde jazasyn ótep jatqan eki sottalǵan áıel de sot sheshimimen bosatyldy. Olardyń kámeletke tolmaǵan balalarynyń bary eskerilip, bul isterge erekshe turǵydan qaraldy. Bostandyqqa shyqqan analar kózine jas alyp, istegen isterine ókinip, aldaǵy ýaqytta balalaryna jaqsy tárbıe berýge jáne qoǵamǵa paıdaly bolýǵa nıetti ekenin jetkizdi.

Aıta keteıik, budan buryn Qaraǵandy oblysynda 500-den astam jazasyn óteýshige raqymshylyq zańy qoldanylýy múmkin ekendigin jazǵan bolatynbyz.