Túrkistan men Kentaý arasyndaǵy jol 4 jolaqty bola ma
TÚRKІSTAN. KAZINFORM — Qos qalanyń ortasynda kólik apaty kóbeıgen.
Túrkistan qalasy oblys ortalyǵy atanǵaly beri qasyndaǵy shaǵyn shahar Kentaý da qatar damı bastady. Barys-kelis artqan soń joldaǵy kólik aǵyny kóbeıgen.
Degenmen, eki qalany baılanystyratyn jol tar. Sonyń saldarynan sońǵy kezde jol-kólik oqıǵalarynyń sany artyp otyr.
Jyl basynda Túrkistan-Kentaý trassasynyń boıynda eki kólik soqtyǵysyp, ishindegi 6 adam mert boldy, al 4 adam jaraqat aldy.
Atalǵan másele jýyrda Parlament Májilisinde de kóterildi. Depýtat Ulasbek Sádibekov Úkimetke óńirdegi tranzıttik áleýetke qatysty depýtattyq saýal joldady.
— Túrkistan qalasynyń qasynda, ıaǵnı 30 shaqyrym jerde Kentaý qalasy ornalasqan. 100 myńnan astam halqy bar shaǵyn shahar turǵyndarynyń basym bóligi Túrkistanda qyzmet etedi. Sondaı-aq, ul-qyzdary Túrkistandaǵy ýnıversıtette oqıdy. Eki qalanyń ortasy jarty saǵattyq jol bolǵandyqtan Túrkistanǵa alys qaladan kelýshiler Kentaýda páter jaldap turady. Bir sózben aıtqan qos qalada tirshilik qaınap jatyr. Sondyqtan eń aldymen kentaýlyqtar Túrkistanǵa barar joldy keńeıtip berýdi suraıdy. Bul jolmen Sozaq aýdany arqyly Jambyl oblysyna da shyǵýǵa bolady. Sol sebepten Túrkistannan Kentaýǵa deıingi aralyq 4 jolaqty bolsa degen jergilikti turǵyndardyń ótinishi bar, — dedi Ulasbek Sádibekov.
Keshegi kúni Túrkistan oblysynyń ákimi Nuralhan Kósherov kentaýlyqtarmen kezdesti. Atalǵan jıynda qos qalany jalǵaıtyn jol jaıy taǵy da kóterildi.
Turǵyndardyń ótinishine jaýap bergen oblys basshysy ázirge Túrkistan-Kentaý arasyndaǵy joldy keńeıtý josparda joq ekendigin jetkizdi.
— Aınalma joldardyń jobasy qarastyrylǵan. Bıyl bastaımyz ba degen josparymyz bar. Keptelis bolsa da, jol apaty bolsa da — bári ózimizge baılanysty. Jol belgileriniń barlyǵy qoıylǵan. Eger jol erejesin, jyldamdyq mejesin eshkim buzbasa, bári durys bolady, eshkim apatqa ushyramaıdy, — dedi Nuralhan Kósherov.
Aıta keteıik, budan buryn Túrkistan qalasyn kesip ótetin avtoban qala syrtyna shyǵarylatynyn jazǵan bolatynbyz.