Túrkistan-Kentaý avtojoly 4 jolaqqa keńeıtilýi múmkin

ASTANA. KAZINFORM – Premer-mınıstrdiń birinshi orynbasary Roman Sklıar Májilis depýtatynyń saýalyna joldaǵan jaýapta Túrkistan-Kentaý baǵytyndaǵy temirjol men avtojol ınfraqurylymy qalaı damıtynyn aıtqan.

- Qazirgi tańda Túrkistan – Kentaý avtomobıl jolyn 2 jolaqtan 4 jolaqqa deıin keńeıtý máselesin pysyqtaý úshin jol qozǵalysynyń qarqyndylyǵyn esepteý júrgizilýde. Kólik mınıstrligi men Túrkistan oblysynyń ákimdigi joldy qaıta jańartýdyń qarqyndylyǵy men ekonomıkalyq oryndylyǵyn belgileý esebiniń qorytyndysy boıynsha, bıýdjet qarajatynyń múmkindigine qaraı jobany respýblıkalyq bıýdjetten beriletin transfertter esebinen tepe-teń negizde odan ári iske asyrýdy qaraıdy, - dep jazylǵan jaýapta.

Vıtse-premer Túrkistan-Kentaý temirjol tarmaǵyn salý úshin qazir basym baǵytta turǵan jobalar aıaqtalý kerektigin aıtady.

- Túrkistan oblysynyń Kentaý qalasynan Sozaq aýdanyna deıingi jańa temirjol jelisiniń qurylysy aǵymdaǵy basym jobalardy iske asyrǵannan keıin qaralady, - deıdi Roman Sklıar.

Onyń sózinshe, basym baǵyttaǵy jobalar mynalar:

- Dostyq – Moıynty» ekinshi jolynyń qurylysy;

- Almaty aınalma joly;

- «Darbaza – Maqtaaral»;

- «Baqty – Aıagóz» tarmaǵy;

- «Moıynty – Qyzyljar» jelisi;

- «Qyzyljar – Sekseýil», «Shalqar – Beıneý» ýchaskelerinde avtomatty buǵattaý júıelerin jańǵyrtý;

- «Beıneý – Mańǵystaý», «Altynkól – Jetigen» ýchaskelerin jańǵyrtý.

Buǵan deıin Atyraý oblysynyń Reseı Federatsııasymen shekarasyndaǵy Qurmanǵazy aýdanynda 10 eldi mekenge baratyn jolǵa asfalt tóselmegenin jazǵan edik.