Túrkistan qalasynyń dızaın-kody bekitildi
TÚRKІSTAN. KAZINFORM - Resmı qujat jarııalanǵan bastap kúntizbelik on kún ótken soń qoldanysqa engiziledi.
«Túrkistan qalasynyń erekshe mártebesi týraly» QR Zańynyń 8-babynyń 2) tarmaqshasyna sáıkes, Túrkistan qalalyq máslıhaty sheshim qabyldady. Túrkistan qalasynyń dızaın-kody osy sheshimniń qosymshasyna sáıkes bekitildi.
- Dızaın-kod - bul qalalyq keńistik elementteriniń mindetti vızýaldy quramdas elementterin retteıtin talaptar jınaǵy: ǵımarattar men qurylystardyń qasbetteri, abattandyrý, mańdaıshalar, nusqaǵyshtar, shaǵyn sáýlet nysandary jáne birtutas estetıkalyq sáýletti, jaıly, qoljetimdi jáne qaýipsiz qalalyq ortany qalyptastyrýǵa baǵyttalǵan qalalyq ınfraqurylymnyń elementteri, - delingen qujatta.
Sondaı-aq, dızaın kod sáýlet-landshaft ortasyn qalyptastyrý, kóshelerdiń, magıstraldardyń, týrıstik marshrýttardyń, qalanyń basqa aýmaqtarynyń syrtqy kórinisi tujyrymdamasyn bezendirý jáne abattandyrý elementterin ornalastyrý talaptaryn, sondaı-aq ǵımarattar men qurylystardyń qasbetterin bezendirý talaptaryn qamtıtyndyǵy aıtylǵan.
Tarıhı ortalyqtyń shekaralarynda, sondaı-aq tarıh jáne mádenıet eskertkishteriniń qorǵaý aımaqtarynda barlyq qala qurylysy obektileri men olardyń sıpattamalary, mádenı jáne tarıhı qundylyǵy saqtalýy tıis.
- Dızaın kod Túrkistan qalasynyń aýmaǵynda sáýlet, qala qurylysy jáne qurylys qyzmetin júzege asyrý barysynda memlekettik organdar men barlyq menshik nysanyndaǵy uıymdar arasynda týyndaıtyn qatynastardy retteıdi, jaıly jáne qaýipsiz qalalyq ortany, aýmaqtyq josparlaýdyń negizgi modelderin jáne josparlaý qurylymyn uıymdastyrýǵa qoıylatyn talaptardy qalyptastyrýǵa baǵyttalǵan, - delingen máslıhat sheshiminde.
Aıta keteıik, budan buryn Túrkistan oblysynda halyqtyń 74 paıyzy aýylda turatyndyǵyn jazǵan bolatynbyz.