Túrkistan qalasynyń 32 paıyzy ǵana káriz júıesine qosylǵan

Túrkistan qalasynyń 32 paıyzy ǵana káriz júıesine qosylǵan. Bul týraly Túrkistan qalasynyń ákimi Nurbol Turashbekov málimdedi, dep habarlaıdy Kazinform.

Oblys ortalyǵy Túrkistan qalasynda ortalyqtandyrylǵan káriz júıesine 13 601 abonent qana qosylǵan.

Bul — jalpy qalanyń 32,2 paıyzy.

Sarqyndy sý tazalaý ǵımaratynda bıotazalaý júıesi tolyq jumys atqarý úshin táýligine keminde 10 myń tekshe káriz sýy kelýi kerek. 

Qala aýmaǵy kvartalishilik abonenttik jelimen qamtamasyz etilmegendikten bul ázirshe múmkin bolmaı otyr.

Sebebi júrgizilgen sarqyndy sý jelileriniń basym bóligi — magıstraldy qubyrlar.

Osyǵan oraı qala kólemin sarqyndy sý júıesimen jáne abonenttik qosylymdarmen qamtamasyz etý maqsatynda Túrkistanda 14 jobany júzege asyrý qajet.

«Qazirgi tańda 7 nysannyń qurylysy júrip jatyr. Úsh nysan 2023 jyly paıdalanýǵa tapsyrylady. Bıyl tórteýiniń qurylysy bastaldy. 2023 jyldyń sońyna deıin sarqyndy sý jelisimen qamtamasyz etý kórsetkishin 36,3 paıyzǵa jetkizý josparymyzda bar. Sonymen qatar, 3 nysan respýblıkalyq bıýdjetke qarjylandyrýǵa usynyldy. Atalǵan jobalar tolyqtaı iske qosylǵan jaǵdaıda 2025 jylǵa qaraı qala aýmaǵyn káriz júıesimen qamtý kórsetkishi 95 paıyzǵa jetedi», - dedi qala ákimi Nurbol Turashbekov.