Túrkistanda mektepter men kolledjder ýaqytsha qashyqtan oqytýǵa kóshti
TÚRKІSTAN. KAZINFORM – Túrkistan qalasyndaǵy birqatar bilim berý uıymy eki kúnge qashyqtan oqytý júıesine aýystyryldy.
15 mamyrda Túrkistan qalasynda Túrki memleketteri uıymynyń beıresmı sammıti ótedi.
Osyǵan oraı bilim alýshylardyń qaýipsizdigin qamtamasyz etý jáne qala aýmaǵynda engiziletin ýaqytsha qozǵalys shekteýlerin eskere otyryp, 14-15 mamyr kúnderi birqatar bilim berý uıymy onlaın formatta oqytylady.
– Túrkistan qalasyndaǵy 8 kolledj ben barlyq orta bilim berý uıymy (38 memlekettik jáne 44 jekemenshik mektep) qashyqtan oqytý júıesine kóshirildi. Sondaı-aq «Jańa qala» men «Otyrar» shaǵynaýdanynda ornalasqan 5 balabaqsha tárbıelenýshileri ýaqytsha demalysqa jiberildi, - dep habarlady oblystyq bilim basqarmasy.
Vedomstvo qashyqtan oqytý protsesin tıimdi uıymdastyrý úshin qajetti daıyndyq jumystary júrgizilgenin habarlady. Barlyq bilim berý uıymyna sabaqtardy bekitilgen kestege sáıkes onlaın formatta ótkizý jóninde naqty tapsyrmalar berilgen. Sonymen qatar ata-analarǵa aldyn ala eskertý jasalyp, resmı habarlamalar joldanǵan.
Budan buryn Túrkistanda birqatar kóshede kólik qozǵalysy ýaqytsha shekteletinin jazǵan edik.
