Túrkistan qalasynda qurbandyq malyn qaı jerde soıýǵa bolady

TÚRKІSTAN. KAZINFORM - Qurban aıt merekesi qarsańynda Túrkistan qalasynda mal soıýǵa arnalǵan arnaıy oryn belgilendi.

Túrkistandyqtar Saýran aýdanynyń Qarashyq eldi mekeninde ornalasqan «Nur-Ásem» mal soıý pýnktinde qurbandyq malyn soıa alady. Bul nysan mal bazary aýmaǵynda ornalasqan jáne veterınarııalyq-sanıtarııalyq normalarǵa tolyq sáıkes keledi. Mal soıý qyzmetin qasapshylar atqarady.

Atalǵan shara turǵyndar tarapynan qurbandyq shalý rásimin veterınarııalyq-sanıtarııalyq talaptarǵa saı júzege asyrýdy qamtamasyz etý úshin qolǵa alyndy.

Al, turǵyndar tarapynan qurbandyq maly úı jaǵdaıynda soıylatyn bolsa, onyń aýrý belgileriniń joqtyǵyn veterınarııalyq mamandar tekserýi qajet. Osy maqsatta qala aýmaǵy 6 sektorǵa bólingen. Ár sektorǵa jaýapty veterınar mamandar bekitilgen.

Túrkistan qalasynyń veterınarııalyq qyzmeti turǵyndardy bekitilgen tártipke saı áreket etýge, sanıtarlyq-gıgıenalyq talaptardy qatań saqtaýǵa shaqyrady.

Sondaı-aq, úı jaǵdaıynda soıylǵan maldyń bıologııalyq qaldyqtaryn arnaıy mal ólekselerin kómetin shuńqyrǵa zalalsyzdandyrý mal ıesiniń jaýapkershiligimen uıymdastyrylatynyn eskertedi.

- Janýarlardan alynatyn ónimder men shıkizatty veterınarııalyq-sanıtarııalyq saraptamasyz satýǵa tyıym salynady. Bul talaptar oryndalmaǵan jaǵdaıda, Qazaqstan Respýblıkasy Ákimshilik quqyq buzýshylyq týraly kodeksiniń tıisti baptaryna sáıkes ákimshilik jaýapkershilik qarastyrylady, - delingen Túrkistan qalasy aýmaqtyq ınspektsııasy taratqan aqparatta.

Aıta keteıik, budan buryn Shymkentte Qurban aıt merekesine oraı mal soıýǵa arnalǵan resmı oryndar belgilenin jazǵan bolatynbyz.