Túrkistan qalasynda 500 oryndyq tergeý ızolıatory salynady

TÚRKІSTAN. KAZINFORM – Túrkistan qalasynda oblys ákiminiń birinshi orynbasary Zulpyhar Joldasovtyń tóraǵalymen ótken qylmystyq-atqarý júıesindegi ózekti máselelerge qatysty májiliste óńirde tergeý ızolıatoryn salý máselesi talqylandy.

Oblys ákimdigi baspasóz qyzmetiniń málimetinshe, jıyn barysynda Túrkistan oblysy QAJ departamentiniń ákimshilik ǵımaratynyń jaı-kúıi, Túrkistan qalasynda 500 oryndyq tergeý ızolıatory men 50 oryndyq arnaıy qabyldaǵysh salý, beınebaqylaý júıesin ornatý, № 55 mekemeniń qaýipsizdik ınfraqurylymy, mektep pen kolledj ǵımarattaryn teńgerimge ótkizý, óndiristik qyzmetti damytý, № 55 mekemeniń ákimshilik ǵımaratyn jóndeý jáne probatsııa qyzmetin materıaldyq-tehnıkalyq turǵyda jabdyqtaý máseleleri sóz boldy.

Májiliste oblys ákiminiń birinshi orynbasary Zulpyhar Sansyzbaıuly naqty tapsyrmalar berdi.

— Probatsııa esebinde turǵan azamattar úshin suranysqa ıe mamandyqtar boıynsha jumys oryndaryn kóbeıtý qajet. Sonymen qatar Prezıdent Ákimshiligi basshysynyń 2025 jylǵy 20 qazandaǵy QAJ júıesine qatysty hattamalyq tapsyrmalaryn oryndaý maqsatynda Shymkent qalasy jáne Túrkistan oblysy boıynsha QAJ departamenti men ákimdik basqarmalary birlese jumys júrgizýi tıis. Barlyq tapsyrma belgilengen merzimde oryndalýy qajet. Oblys aýmaǵynda probatsııa úılerin ashý máselesi pysyqtalyp, iske asyrylýy qamtamasyz etilsin, — dedi ol.

Jıyn qorytyndysynda saladaǵy kemshilikterdi joıý boıynsha jaýapty mekemelerge naqty tapsyrmalar júkteldi.

Budan buryn Túrkistan oblysyndaǵy atystan bir adam qaza taýyp, úsh adam aýrýhanaǵa jetkizilgenin jazǵan edik.