Túrkistan bý-gaz qondyrǵysy men Almaty JEO qurylysy keler jylǵa qaldyryldy
ASTANA. KAZINFORM — Qazaqstanda elektr energııasyna suranys artyp, qoldanystaǵy energetıkalyq júıege túsetin salmaq kúsheıip keledi. Tapshylyqty azaıtý úshin 2029 jylǵa deıin 13,3 GVt bolatyn jańa generatsııa nysandaryn iske qosý josparlanyp otyr. Bul týraly Premer-mınıstrdiń birinshi orynbasary Nurlybek Nálibaev aıtyp berdi.
Onyń aıtýynsha, Qazaqstannyń biryńǵaı energetıkalyq júıesi 254 energııa kózinen turady, onyń 172-si jańartylatyn energııa kózderine jatady. Búkil júıeniń qolda bar qýaty 17 GVt quraıdy.
Bıylǵy 10 aıda elektr energııasyn óndirý kólemi 102 mlrd kVt·saǵattan, al tutyný kólemi 103 mlrd kVt·saǵattan asty.
— Sońǵy birneshe jyl boıy elektr energııasyn tutynýdyń eń joǵary júkteme saǵattarynda 800 MVt-tan 2 GVt-qa deıin manevrlik generatsııa qýatynyń tapshylyǵy baıqalady. Bul tapshylyq kórshiles elderdiń energetıkalyq júıelerimen qatar jumys isteý esebinen jabylýda. Osyǵan baılanysty energetıkalyq qaýipsizdikti qamtamasyz etý jáne ekonomıkanyń ósip kele jatqan qajettilikterin óteý maqsatynda jańa generatsııa qýattaryn iske qosý josparlandy, — dedi Nurlybek Nálibaev Úkimette ótken baspasóz máslıhatynda.
Bıyl paıdalanýǵa beriletin qýattar kólemi 1,27 GVt quraıdy. Al 2027 jyly jalpy qýaty 2,5 GVt bolatyn generatsııa nysandaryn paıdalanýǵa berý josparlanǵan.
— Birqatar sebepke baılanysty Túrkistan qalasyndaǵy bý-gaz qondyrǵysy men Almaty qalasyndaǵy úshinshi JEO qurylysyn aıaqtaý kelesi jylǵa aýystyryldy. 2029 jyldy qosa alǵanda 13,3 GVt energetıkalyq qýat iske qosylady. Onyń ishinde 7,4 GVt — bazalyq generatsııa, al 5,9 GVt — jańartylatyn energııa kózderiniń qýaty. Bul jobalardy iske asyrý elektr energııasyna degen barlyq qajettilikti ótep, generatsııalaý qýattarynyń 20% profıtsıtin qalyptastyrady, — dedi N. Nálibaev.
Memleket basshymyzdyń tapsyrmasyn oryndaý aıasynda halyqaralyq ınstıtýttardyń qoldaýymen 2035 jylǵa deıingi energetıkalyq teńgerim ózektendiriledi.
Bul jumys sheńberinde ónerkásip pen tsıfrlandyrý salalarynda iske asyrylyp jatqan jobalardy, qoldanystaǵy elektr stantsııalaryn «taza kómir» tehnologııalary negizinde jańǵyrtý sharalaryn eskerip, ekonomıkanyń odan ári ósýine boljam jasaldy.
— Qazaqstannyń búkil energetıkalyq júıesiniń ornyqtylyǵyn arttyrý úshin jańartylatyn energetıkany, atap aıtqanda kún energetıkasyn, energııa jınaqtaý júıelerin damytýǵa erekshe nazar aýdarylady, — dedi ol.
Buǵan deıin N. Nálibaev bıyl qandaı joldar ashylatynyn aıtqan edi.
Jaqynda Almatydan Tokıoǵa tikeleı reıs ashylyp, Vena, Nıý-Iork jáne Mılan baǵyttary boıynsha áýe qatynasy jolǵa qoıylady.
