Túrkistan áýejaıyn senimgerlik basqarýǵa alýǵa nıetti kompanııalar belgili boldy

TÚRKІSTAN. KAZINFORM — Túrkistan halyqaralyq áýejaıyn damytý maqsatynda oblystyq ákimdik bıylǵy jyldyń sońyna deıin áýejaıdy senimgerlik basqarýǵa berýdi josparlap otyr.

Túrkistan oblysy jolaýshylar kóligi jáne avtomobıl joldary basqarmasynyń málimetinshe, Túrkistan halyqaralyq áýejaıyn senimgerlik basqarýǵa birneshe áýe kompanııalary nıet bildirgen.

Olardyń qatarynda otandyq jáne sheteldik avıakompanııalar da bar. Atap aıtar bolsaq, «Qazaq Air», «Fly Arystan», «Alpha Sky», «Turkish Cargo», «MNG», «ASL Airlines», «Sovico Group» kompanııalary qyzyǵýshylyq tanytqan.

— Túrkistan oblysy ákimdigi tarapynan qoıylatyn talaptarǵa baılanysty «China Henan Avation Group» jáne «Qazaq Air» áýekompanııalary Túrkistan halyqaralyq áýejaıyn senimgerlik basqarýǵa alýdan bas tartty. Senimgerlik basqarýǵa berilgen mekemege satyp alý quqyǵy berilmeıdi. Senimgerlik basqarýǵa bergennen keıin, qoıylǵan talaptar oryndalmaǵan jaǵdaı kelisimshartty bir jaqty buzý jáne taǵy basqa da sharalar qoldaný qarastyrylǵan. Senimgerlik basqarýǵa berýdiń nátıjesi resmı buqaralyq aqparat quraldarynda jarııalanatyn bolady, — delingen basqarma usynǵan aqparatta.

Túrkistan halyqaralyq áýejaıy Túrkistan oblysy ákimdiginiń kommýnaldyq menshiginde. Qazirgi ýaqytta Túrkistan halyqaralyq áýejaıynda 4 halyqaralyq baǵyt boıynsha (Ystanbul, Kýveıt, Abý-Dabı, Samarqand) jáne 7 ishki baǵyt boıynsha (Astana, Almaty, Aqtaý, Aqtóbe, Oral, Qostanaı jáne Qaraǵandy) turaqty áýe qatynasy qamtamasyz etilip keledi.

Aıta keteıik, budan buryn Túrkistandaǵy áýejaı senimgerlik basqarýǵa beriletindigin jazǵan bolatynbyz.