Túrkistan arena ÝEFA týrnırleri aıasynda alǵashqy resmı matchyn qabyldady
TÚRKІSTAN. KAZINFORM – Túrkistan qalasyndaǵy «Túrkistan Arena» stadıonynda Qazaqstan men Slovakııanyń 21 jasqa deıingi jastar quramalary arasynda tartysty kezdesý ótti.
Atalǵan oıyn 21 jasqa deıingi jastar arasyndaǵy Eýropa chempıonatyna irikteý kezeńi aıasynda uıymdastyryldy.
Túrkistanda ÝEFA basshylyǵy aıasynda ótken alǵashqy resmı match joǵary deńgeıde uıymdastyryldy. Halyqaralyq deńgeıdegi matchqa jergilikti jankúıerler erekshe qyzyǵýshylyq tanytyp, stadıon tolyq toldy. Jeti myńdaı jankúıer jınalyp, trıbýnalarda ıne shanshar oryn qalmady. Túrkistan jurtshylyǵy Qazaqstannyń jastar quramasyna qyzý qoldaý kórsetip, oıyn boıy ulttyq quramaǵa dem berdi. Jankúıerlerdiń belsendiligi alańdaǵy oıynshylarǵa erekshe serpin syılady.
Tartysty ótken match, ókinishke qaraı qonaqtardyń paıdasyna sheshildi. Slovakııalyqtar saýatty ári qorǵanysta saq oınap, 3:1 esebimen jeńdi.
Mundaı mańyzdy kezdesýlerdiń Túrkistanda ótýi óńirdegi sport ınfraqurylymynyń qarqyndy damyp kele jatqanyn kórsetedi. Sonymen qatar bul — jastar fýtbolyn damytýǵa jáne jas býynnyń sportqa degen qyzyǵýshylyǵyn arttyrýǵa baǵyttalǵan mańyzdy qadam.
Aıta keteıik, «Túrkistan Arena» stadıony — halyqaralyq deńgeıdegi zamanaýı sport nysany. ÝEFA talaptaryna saı stadıonda Qazaqstan jastar quramasy 31 naýryzda Irlandııa jastaryn qabyldaıdy. Kezdesý saǵat 20:00–de bastalady, kirý tegin.
