Túrkistan alǵash ret eń tanymal týrıstik óńirlerdiń qataryna endi
ASTANA. KAZINFORM - 2026 jyldyń alǵashqy toqsanynda Qazaqstan ishinde týrıster eń kóp demalǵan óńirler belgili boldy. Bul týraly Týrızm jáne sport mınıstrligi Kazinform agenttiginiń resmı saýalyna bergen jaýabynda habarlady.
Týrızm ındýstrııasy komıteti tóraǵasynyń orynbasary Aıdyn Qapashevtyń aıtýynsha, bıylǵy birinshi toqsanda ishki týrıster eń kóp barǵan óńirler qatarynda Aqmola oblysy, Shymkent qalasy, Almaty oblysy, Túrkistan oblysy jáne Shyǵys Qazaqstan oblysy bar.
– Sońǵy jyldary ishki týrızmde óńirlik qurylymnyń ózgergeni baıqalady. 2022–2023 jyldary kóshbasshylar qatarynda Aqmola, Shyǵys Qazaqstan jáne Almaty oblystary bolsa, 2024 jyly Mańǵystaý oblysy týrıster sanynyń aıtarlyqtaı ósýiniń arqasynda aldyńǵy orynǵa shyqty. 2025 jyly Aqmola jáne Almaty oblystary kóshbasshylyq pozıtsııasyn nyǵaıtty. Al 2026 jyldyń I toqsanynda Túrkistan oblysy alǵash ret ishki týrıster eń kóp barǵan bes óńirdiń qataryna endi. Bul óńirdegi týrıstik ınfraqurylymnyń damýy men tarıhı-mádenı týrızmge qyzyǵýshylyqtyń artyp kele jatqanyn kórsetedi, – dedi ol.
Komıtet málimetinshe, Ulttyq statıstıka bıýrosynyń derekteri boıynsha, týrıster eń kóp toqtaǵan óńirlerdiń kóshin Almaty qalasy (472 930 týrıst) bastap tur. Odan keıin Astana qalasy (352 243), Aqmola oblysy (161 169), Shymkent qalasy (139 443) jáne Almaty oblysy (112 845) ornalasqan.
– 2025 jyldyń osy kezeńimen salystyrǵanda, 2026 jyldyń alǵashqy toqsanynda týrıster sanynyń eń joǵary ósimi Aqmola oblysynda tirkelgen. Óńirdegi kórsetkish 42 paıyzǵa artty. Odan keıin Shymkent qalasy (+39,3 paıyz) men Astana qalasy (+12,1 paıyz) keledi, - dedi spıker.
Onyń sózinshe, bul baǵyttardyń suranysqa ıe bolýyna elderdiń jaqyn ornalasýy, tildik kederginiń bolmaýy, áýe bıletteriniń salystyrmaly túrde qoljetimdi bolýy jáne qysqa merzimdi demalysqa qolaıly bolýy áser etip otyr.
Aıta keteıik, buǵan deıin Qazaqstandyqtar qaı elderge kóbirek saıahattaı bastaǵany jóninde de materıal jazǵanbyz.
