Túrkistan, Aqtaý jáne Atyraý sý únemdeý jobasyna qosylady
ASTANA. KAZINFORM — Qazaqstanda balalar arasynda sý únemdeý mádenıetin qalyptastyrýǵa baǵyttalǵan ıÝNISEF-pen birlesken joba birneshe óńirdi qamtıdy.
Sý resýrstary jáne ırrıgatsııa vıtse-mınıstri Aslan Abdraımov Qazaqstandaǵy ıÝNISEF ókili Rashed Mustafa Sarvarmen kezdesti. Taraptar «Sý jáne bilim» jobasyn keńeıtý máselesin talqylady. Joba Sý resýrstarynyń aqparattyq-taldaý ortalyǵy» KEAQ jáne Oqý-aǵartý mınıstrligimen birlesip júzege asyrylyp keledi.
ıÝNISEF jobany Túrkistan oblysyna keńeıtýge, al keıinnen Kaspıı mańy óńirlerin, sonyń ishinde Aqtaý men Atyraý qalalaryn qamtýǵa qoldaý kórsetýge daıyn.
Kezdesýde sý únemdeý mádenıetiniń ıdeologııasyn qalyptastyrýǵa baǵyttalǵan birlesken tujyrymdama ázirleý máselesine erekshe nazar aýdaryldy. «Sý jáne bilim» jobasy óz tıimdiligin kórsetkendikten, bul jumysty jalǵastyryp, aýqymyn keńeıtý jáne aldaǵy eki jylǵa arnalǵan uzaq merzimdi formatta júzege asyrý týraly sheshim qabyldandy.
Osy maqsatta ıÝNISEF óz eriktiler qozǵalysy men joǵary oqý oryndary janyndaǵy habtardy jobaǵa tartýdy usynady. Jumys barysynda jasóspirimder men jastar sý resýrstaryn únemdeý taqyrybyn oqyp qana qoımaı, praktıkalyq bastamalarǵa da qatysady. Atap aıtqanda, sý salasyndaǵy startaptar jasap, sý únemdeýge baǵyttalǵan sheshimder ázirleıdi.
— Bizdiń mindetimiz — jınaqtalǵan tájirıbeni júıeli ári uzaq merzimdi jumysqa aınaldyrý. Sý salasynyń óńirlik qurylymyn ıÝNISEF-tiń eriktiler jelisimen biriktire otyryp, sý únemdeýge baǵyttalǵan ulttyq qozǵalys qalyptastyra alamyz. Bul qozǵalystyń negizgi qozǵaýshy kúshi jasóspirimder men jastar bolady, — dedi Sý resýrstary jáne ırrıgatsııa vıtse-mınıstri Aslan Abdraımov.
Aıta ketelik mınıstrlik sý berýdiń turaqtylyǵyn aldyn ala qamtamasyz etetini týraly jazǵan edik.
