Túrkistan ákimdigi kásipkerge 27 mln tenge turaqsyzdyq aıybyn tóledi

TÚRKІSTAN. KAZINFORM- Qala ákimdigi jumys aqysyn 3 jylǵa keshiktirgen.

2019 jyldyń naýryz aıynda «Dorstroı» JShS men Túrkistan qalasy ákimdiginiń «Jolaýshylar kóligi jáne avtomobıl joldary bólimi» memlekettik mekemesi arasynda Túrkistan qalasyndaǵy avtojolǵa kúrdeli jóndeý jumystaryn júrgizýge memlekettik satyp alý týraly sharty jasalǵan. 

Atalǵan qurylys jumystary 2020 jyldyń qarasha aıynda aıaqtalyp, tapsyrys berýshi nysandy qabyldap alǵan. Degenmen, aqy tóleýge kelgende ákimdik tarapynan birshama máseleler týyndaǵan. 

- Qala ákimdigi jumys aqysyn 3 jylǵa keshiktirip tólegeni úshin «Dorstroı» JShS ákimdikten turaqsyzdyq aıybyn óndirý týraly sotqa talap aryzben júginip, Túrkistan oblysynyń mamandandyrylǵan aýdanaralyq ekonomıkalyq soty talap aryzdy negizsiz qanaǵattandyrýdan bas tartqan. Alaıda, oblys prokýratýrasy shyǵarylǵan sheshimmen kelispeı apellıatsııalyq ótinishhat engizip, nátıjesinde memlekettik mekemeden kásipkerdiń paıdasyna 27 mln tenge turaqsyzdyq aıyby óndirildi, - delingen Túrkistan oblysy prokýratýrasy taratqan aqparatta.

Aıta keteıik, budan buryn ShQO ekologtary kásiporyndarǵa 2,2 mlrd teńge aıyppul salǵanyn jazǵan bolatynbyz.