«Túrksoıdyń» uıymdastyrýymen ıÝNESKO-nyń shtab-páterinde túgel túrkiniń uly kúni - Naýryz meıramy toılanady (FOTO)
ASTANA. QazAqparat - 24 naýryz kúni Halyqaralyq TÚRKSOI uıymy men ıÝNESKO-daǵy túrkitildes elderdiń turaqty ókilderiniń uıymdastyrýymen ıÝNESKO-nyń Parıj qalasyndaǵy shtab-páterinde túgel túrkiniń uly kúni - Naýryz meıramyna arnalǵan kontserttik kesh ótedi, dep habarlady halyqaralyq uıymnyń baspasóz qyzmetinen.
Naýryz merekesi - búkil túrkitildes halyqtardyń basyn biriktiretin, qundylyqtardy álemge pash etetin ata-babadan qalǵan mádenı mura. Halyqaralyq túrki mádenıeti men ónerin damytý uıymy TÚRKSOI jyl saıyn dástúrli túrde Naýryz merekesine arnalǵan kontserttik keshter uıymdastyratyny málim. 5 qańtar 2015 jyly TÚRKSOI shtab-páterine resmı is-saparmen kelgen ıÝNESKO Bas dırektory Irına Bokovamen Halyqaralyq Naýryz merekesin ótkizýge baılanysty jasalǵan kelisim boıynsha 24 naýryz 2015 jyly Naýryzǵa arnalǵan merekelik kesh ótedi. Aıtýly halyqaralyq sharaǵa Ázerbaıjan, Qazaqstan, Qyrǵyzstan, Túrkııa, Ózbekistan, Túrkimenstan, Moldova, Mońǵolııa sondaı-aq, Reseı Federatsııasynyń quramyndaǵy Tatarstan, Bashqortostan, Altaı, Týva, Saha-ıAkýtııa, Hakasııa, Daǵystan syndy elderden 100-den astam talantty ónerpazdar qatysady. Elimizden Qazaqstan halyq ártisi Roza Rymbaeva, «Sazgen sazy» folklorlyq-etnografııalyq ansambli jáne «Asylym» halyqtar bıi ansambli óz ónerlerin kórsetedi. Sonymen qatar, merekelik shara aıasynda TÚRKSOI-dyń «Naýryz boıaýlary» atty fotokórmesi ótedi. Naýryz merekesine arnalǵan kontserttik keshter tek, Parıj qalasynda ǵana ótpeıtini belgili. TÚRKSOI-dyń uıymdastyrýymen 18-30 naýryz kúnderi aralyǵynda Túrkııanyń 20-dan astam iri-iri qalalarynda Naýryz merekelik kontserttik keshter ótetindigin habarlaımyz.
