TÚRKSOI Jastar kameralyq orkestriniń kontserttik týrnesi Túrkistannan bastalady

TÚRKІSTAN. QazAqparat - Túrki keńesiniń 10 jyldyǵyna arnalǵan TÚRKSOI Jastar kameralyq orkestriniń kontserttik týrnesi Túrkistan qalasynan bastalady. Bul týraly Jastar resýrstyq ortalyǵynda ótken baspasóz-máslıhatynda TÚRKSOI Halyqaralyq uıymynyń Bas hatshysy Dúısen Qaseıinov málim etti, dep habarlaıdy QazAqparat.

Uıymdastyrýshylar - QR Mádenıet jáne sport mınıstrligi, TÚRKSOI Halyqaralyq uıymy jáne Túrkistan oblysy ákimdigi.

«Ózderińizge belgili, TÚRKSOI Halyqaralyq uıymy 2017 jyly Túrkistan qalasyn «Túrki áleminiń mádenı astanasy» etip jarııalaǵan bolatyn. Óte joǵary deńgeıde ótken bul halyqaralyq iri jobanyń izin sýytpaı, ótken jyly Elbasymyzdyń bastamasymen oblys ataýy «Túrkistan oblysy» bolyp ózgertilip, oblys ortalyǵy Túrkistan qalasyna kóshirildi. QR Tuńǵysh Prezıdenti-Elbasy Nursultan Nazarbaev óziniń «Uly dalanyń jeti qyry» atty maqalasynda «Jańa oblys ortalyǵy retinde Túrkistandy damytý barysynda onyń halyqaralyq arenadaǵy bedelin júıeli túrde arttyrý qajet» degen bolatyn. Bizdiń uıym osy maqsatta ótken jyly da jańa ashylǵan oblys ortalyǵynda birneshe shara uıymdastyrǵan edi. Bıyl da sol dástúrimizdi jalǵastyryp, TÚRKSOI Jastar kameralyq orkestriniń kezekti kontserttik týrnesin 2017 jylǵy «Túrki áleminiń mádenı astanasy» – Túrkistan qalasynan bastap otyrmyz», – dedi Bas hatshy D.Qaseıinov.

Otandyq jáne sheteldik ónerpazdardyń qatysýymen ótetin kontserttiń barysy men maqsatyna arnalǵan baspasóz konferentsııasyna Reseıdiń eńbek sińirgen ártisi Renat Salavatov, QR eńbek sińirgen qaıratkeri, dırıjer Anvar Aqbarov, Ázerbaıjan elinen kelgen dırıjer, halyqaralyq baıqaýlardyń laýreaty Mustafa Mehmendarov da qatysty.

«TÚRKSOI Jastar kameralyq orkestriniń bul jolǵy kontserttik baǵdarlamasy Túrki Keńesiniń (Túrkitildes memleketterdiń yntymaqtastyq keńesi) qurylǵanyna 10 jyl tolýy qurmetine arnalyp otyr. TÚRKSOI uıymynyń da, Túrki keńesiniń de maqsaty bir – túrkitildes halyqtardyń yntymaqtastyǵyn damytý. Bul orkestr – mádenı qundylyqtarymyzǵa negizdelgen maqsatty jumysymyzdyń kózge kóringen naqty nátıjesi. Sondyqtan, jas ta bolsa halyqaralyq arenada tanymaldyqqa ıe bolǵan ónerpazdarymyzdyń ónerin tamashalaýǵa shaqyramyn», – dedi Dúısen Qaseıinov.

Kontserttik baǵdarlama Qazaqstannyń Túrkistan, Shymkent, Taraz, Almaty qalalarynda, Qyrǵyzstannyń Bishkek jáne Ázerbaıjannyń Baký qalalarynda jalǵasatyn bolady.

Búginge deıin quramynda 10 eldiń 100-den astam talantty jastary óner kórsetken orkestrge bul joly Tatarstannan Renat Salavatov, Qazaqstannan Anvar Akbarov, Ázerbaıjannan Mustafa Mehmendarov dırıjerlik etetin bolady.

Atalǵan qalalar men sheteldegi kontsertter 27 tamyz – 9 qyrkúıek kúnderi aralyǵynda ótedi.