TÚRKSOI uıymy sý tasqynynan zardap shekken Qazaqstan halqyna kómek kórsetpek
ASTANA. KAZINFORM - Túrki mádenıetiniń halyqaralyq uıymy TÚRKSOI elimizdiń birqatar óńirinde qatty sý tasqynynan zardap shekken Qazaqstan azamattaryna qoldaý kórsetýge nıetti.
TÚRKSOI uıymynyń bas hatshysy Sultan Raevtyń aıtýynsha, Halyqaralyq Túrki mádenıeti uıymy Qazaqstandaǵy sý tasqynynan zardap shekkenderge qarjylaı kómek kórsetedi.
Onyń aıtýynsha, 2023 jyly aqpanda Túrkııada bolǵan jer silkinisinen keıin TÚRKSOI uıymynyń «Biz birgemiz» («Biz Birgemiz») bastamasy búkil túrki áleminde sátti iske qosyldy. Bul túrki halyqtarynyń birligi men yntymaǵyn aıǵaqtaıdy.
«Túrki áleminiń qıyn-qystaý kúnderde birligi odan ári artyp, baýyrlas elderdiń qaıǵy-qasiretin jeńildetý úshin barlyq jaǵynan kómektesýge daıyn. Osy qıyn kezeńde biz de Qazaqstanǵa, el halqyna kómekteskimiz keledi. Biz Qazaqstanmen birgemiz! Búginde Qazaqstan qıyn kezeńderdi bastan ótkerip jatyr. Soltústik Qazaqstannyń keıbir aýdandaryn qatty sý basty. Bul apattan el ekonomıkasy zardap shekti. Sizdiń qasiretińiz – bizdiń qasiretimiz. Barsha túrki áleminiń atynan Sizderge kúsh-qýat tileımiz», - dedi TÚRKSOI Bas hatshysy.
Uıym atap ótkendeı, Qazaqstanda sý tasqynynan zardap shekkenderge qarjylaı kómek kórsetý bastamasy óte mańyzdy. Ol baýyrlas halyqtar arasyndaǵy yntymaq rýhyn kórsetedi. Túrki halqy qıyn-qystaý kezeńde bir-birine qoldaý kórsetý úshin birigýge daıyn.
