TÚRKSOI-dyń jastar orkestri Balqan túbegine gastroldik saparǵa shyqty

ANKARA. QazAqparat - Gastrol sapary aıasynda orkestr Chernogorııanyń Tsetıne qalasynda ótetin «Ekspressıvo» halyqaralyq festıvaline qatysty. Bul týraly «Anadoly» «Túrikmenstan - Altyn ǵasyr» agenttigine silteme jasap habarlaıdy.

Ázerbaıjandyq kompozıtor Mustafa Mehmandarov bastaǵan jastar orkestri Mılıvoı Pıkýrıtsanyń «Dıvertısment» álemdik premerasyn usyndy. Orkestr Tsetınede belgili skrıpkashy Vıktor Tretıakovpen bir sahnada óner kórsetti.

«Men jas daryndar ujymy týraly jıi jyly lebiz estımin, birge repetıtsııa jasap, olardyń talantyna tamsandym. Osy festıval aıasynda TÚRKSOI Jastar kameralyq orkestriniń ónerinen lázzat aldym. Budan tys, osy shara attaı 38 jyldan soń dosym Dúısen Qaseıinovpen kezdesýime sebepshi boldy», - deıdi Vıktor Tretıakov.

Kontsert sońynda TÚRKSOI bas hatshysy Dúısen Qaseıinov ónersúıer qaýymǵa taǵzym ete: «Vıktor Tretıakov - bıik óner ıesi, ataqty mýzykant. Oǵan bizdiń orkestrmen birge óner kórsetkeni úshin alǵys bildiremiz», - dedi.

TÚRKSOI Jastar kameralyq orkestriniń Balqan túbegindegi týrnesi 3 tamyz kúni Saraevodaǵy kontsertpen jalǵasady. Gastrol sapary 4 tamyz kúni Zenıtsedegi mýzykalyq keshpen aıaqtalady.