TÚRKSOI-dy jańǵyrtý: Aqtaýda mınıstrler 2026 jylǵa jańa jumys tobyn qurdy
ASTANA. KAZINFORM — Aıda Balaeva TÚRKSOI-dy reformalaý bastamalaryn tanystyrdy. Bul týraly Mádenıet jáne aqparat mınıstrliginiń baspasóz qyzmeti habarlady.
Mádenıet jáne aqparat mınıstri Aıda Balaevanyń jetekshiligimen Aqtaýda TÚRKSOI elderi mádenıet mınıstrleriniń 42-otyrysy ótti.
Jıynda Ázerbaıjandaǵy Gabala qalasynda ótken Túrki memleketteri uıymynyń XII sammıtinde jarııalanǵan qorytyndy qujattar men prezıdentterdiń tapsyrmalary talqylandy.
Otyrys barysynda 2026 jylǵa arnalǵan TÚRKSOI uıymynyń jumysyn jetildirý boıynsha jumys tobyn qurý týraly sheshim qabyldandy.
Sonymen qatar «Aqtaý — Túrki áleminiń mádenı astanasy» jylynyń qorytyndysy shyǵaryldy. Aıda Balaeva óz sózinde aıtýly jyl aıasynda keń aýqymdy jumys atqarylǵanyn atap ótti.
Jıynda TÚRKSOI bas hatshysy Sultan Raev quttyqtaý sóz sóıledi. Ol bıyl uıym úsh myńnan astam ártistiń túrli is-sharalarǵa qatysýyn uıymdastyryp, júzdegen basylym men tsıfrlyq materıal shyǵarǵanyn tilge tıek etti.
— 2025 jyly «Aqtaý — túrki áleminiń mádenı astanasy» jobasyn qoldaǵany úshin Qazaqstan Respýblıkasynyń Prezıdenti Qasym-Jomart Toqaevqa shynaıy alǵysymdy bildiremin. Gabalada ótken sammıtte Qazaqstan Prezıdentiniń sóılegen sózi bul mártebeniń ortaq mádenı keńistigimiz úshin mańyzyn aıqyndaı tústi. Bıyl biz tarıhı oqıǵanyń kýási boldyq: memleket basshylary ýaqyt talabyna saı TÚRKSOI-dy nyǵaıtý qajettigin atap, Bas hatshylyqqa osy jumysty bastaýdy tapsyrdy. Bul jaı ǵana sheshim emes — túrki álemi elderiniń mádenı yntymaqtastyǵynyń bolashaǵyn aıqyndaıtyn strategııalyq kezeń, — dedi bas hatshy.
Otyrys sońynda Aıda Balaeva 2026 jyly Túrki áleminiń mádenı astanasy mártebesi Ándijan qalasyna beriletin bolǵandyqtan, TÚRKSOI-dyń ýaqytsha úılestirýshisi mindetin ózbekstandyq áriptesi Ozodbek Nazarbekovke tapsyrdy.
Kezdesýdiń sońynda TÚRKSOI-ǵa múshe elderdiń deklaratsııasy qabyldandy.
Otyrysta Mádenıet jáne aqparat mınıstri Aıda Balaeva, TÚRKSOI bas hatshysy Sultan Raev, Túrikmenstannyń mádenıet mınıstri Atageldy Shamyradov, Ózbekstannyń mádenıet mınıstri Ozodbek Nazarbekov, Ázerbaıjan Mádenıet mınıstriniń orynbasary Mýrad Gýseınov, Qyrǵyzstan Mádenıet, aqparat, sport jáne jastar saıasaty mınıstriniń orynbasary Askaraly Madamınov, Túrkııa Mádenıet jáne týrızm mınıstriniń orynbasary doktor Serdar Cham, sondaı-aq Mańǵystaý oblysy ákiminiń orynbasary Tilegen Ábishev qatysty.
Túrki mádenıeti halyqaralyq uıymy (TÚRKSOI) ortaq materıaldyq jáne mádenı murany saqtaý, damytý jáne bolashaq urpaqqa jetkizý maqsatynda túrki elderi men aımaqtaryn biriktirý maqsatynda qurylǵan.
Aıta ketelik búginde Qazaqstanda 25 000-nan astam tarıhı‑mádenı mura nysany tirkelgen.