TÚRKSOI: kıno óndirisi salasynda yntymaqtastyq artady
ASTANA. KAZINFORM — Aqtaýda ótip jatqan túrki áleminiń halyqaralyq «Qorqyt ata» kınofestıvali aıasynda Ulttyq kınony qoldaý memlekettik ortalyǵy Ázerbaıjan, Qyrǵyzstan, Túrikmenstan, Túrkııa jáne Ózbekstan elderiniń kınematografııa salasyndaǵy memlekettik uıymdarymen ózara yntymaqtastyq jóninde memorandýmdarǵa qol qoıdy. Bul týraly Mádenıet jáne aqparat mınıstrligi málim etti.
Bul kelisimder — Túrki mádenıetin jáne ónerin damytý halyqaralyq uıymy (TÚRKSOI) sheńberinde ózara yqpaldastyqty damytýǵa baǵyttalǵan aýqymdy jumystyń bir bóligi. Negizgi maqsat — ortaq qundylyqtar men tarıhı murany beıneleıtin kınoóner arqyly túrki elderiniń mádenı birligin nyǵaıtý.
— Ázerbaıjan Respýblıkasynyń Kıno agenttigimen jasalǵan memorandým aıasynda kórkem, derekti jáne anımatsııalyq fılmderdi birlesip túsirý, sheberlik synyptary men semınarlar ótkizý, aýdarma jáne dýblıaj salasyndaǵy yntymaqtastyqty damytý kózdelgen. Halyqtar dostyǵy, ózara yqpaldastyq pen mádenı baılanystardy saqtaý taqyryptaryna da nazar aýdarylady, — delingen habarlamada.
Qyrǵyz Respýblıkasynyń Mádenıet, aqparat, sport jáne jastar saıasaty mınıstrligi janyndaǵy Kınematografııa departamentimen jasalǵan kelisim mádenı baılanystardy nyǵaıtýǵa baǵyttalǵan jobalardy qoldaýdy qarastyrady. Taraptar birlesken kınoóndirister úshin qolaıly jaǵdaı jasaýǵa, sondaı-aq tájirıbe, tehnologııalar jáne mamandarmen almasýǵa ýaǵdalasty.
Túrikmenstannyń Memlekettik komıtetine qarasty Oǵyz han atyndaǵy «Túrikmenfılm» birlestigimen jasalǵan memorandým birlesken fılmder túsirýge jáne shyǵarmashylyq almasýlarǵa jol ashady. Kelisim aıasynda Aqtaý men Ashhabadtyń mádenı baılanystaryn arttyrýǵa jáne túrki halyqtarynyń mýzykalyq murasyn dáripteýge erekshe kóńil bólinedi.
Túrkııa Respýblıkasynyń Mádenıet jáne týrızm mınıstrligine qarasty Bas kıno basqarmasymen qol qoıylǵan kelisim mádenı baılanystardy tereńdetýge jáne ózara túsinistikti nyǵaıtýǵa baǵyttalǵan birlesken kınojobalardy júzege asyrýdy qarastyrady.
Kınematografııa salasyndaǵy yntymaqtastyq koprodýktsııalardy qoldaýdy, shyǵarmashylyq tájirıbe almasýdy, gýmanıtarlyq baılanystardy nyǵaıtýdy jáne kınotýrızmdi damytýǵa yqpal etýdi qamtıdy.
Ózbekstan Respýblıkasynyń Mádenıet mınıstrligi janyndaǵy Kınematografııa agenttigimen jasalǵan kelisim halyqtar arasyndaǵy baılanysty arttyrýǵa jáne mádenı murany saqtaý baǵytyndaǵy jobalardy damytýǵa arnaldy.
Yntymaqtastyq aıasynda Túrkistan, Samarqand jáne Ámir Temir dáýirine qatysty taqyryptarǵa aıryqsha mán beriledi. Sondaı-aq qazaqtyń uly jazýshysy Muhtar Áýezov pen ózbek romanynyń negizin qalaýshy Abdýlla Qadyrı arasyndaǵy rýhanı baılanysty arqaý etken «Pamır taýlaryndaı bıik» atty kórkem-pýblıtsıstıkalyq fılm túsirý jaıy da josparda bar. Bul týyndy eki eldiń dostyǵy men baýyrlastyǵyn beıneleıdi.
Buǵan deıin Ulttyq kıno ortalyǵy Kann kınofestıvali aıasynda Frantsııa jáne Grýzııanyń ulttyq kınoortalyqtarymen memorandýmdarǵa qol qoıǵan bolatyn. Sondaı-aq Taılandpen birlesken «Teńiz ıtbalyqtarynyń ertegisi» atty derekti fılm túsirilýde. Al Frantsııa, Nıderland, Lıtva jáne Shvetsııamen koprodýktsııada túsirilgen «Pobedıteleı vıdno na starte» kórkem fılmi Shveıtsarııanyń Lokarno jáne Ońtústik Koreıanyń Pýsan halyqaralyq kınofestıvalderinde kórsetildi.
Aıta keteıik, Ózbekstan sońǵy 32 jylda alǵash ret TÚRKSOI uıymyna óz ókilin taǵaıyndady.