TÚRKSOI ártisteri «Áýendi Saryarqa» festıvalinde óner kórsetti
QARAǴANDY. QazAqparat - Qaraǵandy oblysynyń ákimi Erlan Qoshanov «Áýendi Saryarqa» halyqaralyq festıvalinde óner kórsetken otandyq jáne sheteldik ártisterdi qabyldady jáne TÚRKSOI halyqaralyq uıymynyń Bas hatshysy Dúısen Qaseıinovti 70 jyldyq mereıtoıymen quttyqtady.
Oblys ákimi baspasóz qyzmetiniń habarlaýynsha, óńir basshysy ártisterge tamasha mýzyka keshterin ótkizgenderi úshin alǵysyn bildirdi.
« Sizge, Dúısen Qorabaıuly, osyndaı joǵary deńgeıli mýzykanttardyń basyn biriktirip, shaqyrǵanyńyz úshin úlken alǵysymdy bildiremin», - dedi Erlan Qoshanov mereıtoı ıesine. - Siz Qaraǵandyny odan da beter áýenge toltyrdyńyz. Saryarqanyń mádenıeti ár ýaqytta joǵary bolatyn. Jáne de osyndaı festıvalder oǵan septigin tıgizedi. Sol úshin sizge kóp rahmet».
Sheteldik qonaqtar qaraǵandylyq sahnada óner kórsetý olar úshin úlken qýanysh ekenin jetkizdi.
- Biz munda qýana kelemiz, bul jerdiń qaýymy tamasha, - dedi Ózbekstannyń halyq ártisi, dırıjer Farýh Sadyqov. - Kórermender bizdi bilip qana qoımaı, kim dırıjerlyq etetinin suraıdy, biz nege ótkende oınaǵan týyndylarymyzdy osy joly oryndamadyq degen saýaldar qoıady. Demek, jergilikti halyq bizdiń ónerimizdi tanyp, biledi degen sóz. Jáne de eń qyzyqtysy - kontsert aıaqtalǵan soń eshkim qaıtqysy kelmeıdi.
Kezdesý barysynda ártisterge gúl shoqtary men Qazybek bıdiń 350-jyldyǵyna arnalǵan estelik kádesyılar tabys etildi.
Óz kezeginde Erlan Qoshanovqa Túrkııa elinen kelgen qonaq Ferıal Bashel estelik kádesyılar tapsyrdy.
