TúrkPA senatorlar saılaýyn oń baǵalady

ASTANA. QazAqparat - Túrki tildes elder Parlamenttik assambleıasynyń mıssııasy Qazaqstanda ótken Parlament Senaty depýtattarynyń saılaýyna joǵary baǵa berdi, dep habarlaıdy QazAqparat.

«Qazaqstan Ortalyq Azııanyń kóshbasshy eli sanalady. Sondyqtan bolar, bul jolǵy saılaý óte joǵary deńgeıde uıymdastyrylyp, demokratııalyq turǵyda ótti. Saılaýdy kóptegen halyqaralyq baıqaýshylar baqylady», - dedi búgin atalǵan mıssııanyń jetekshisi Mustafa Isen elimizdiń Ortalyq saılaý komıssııasynda ótken brıfıngte.

Sonymen qatar mıssııa basshysy Qazaqstannyń odan ary damyp, zor jetistikterge jetýine tilektes ekendikterin basa aıtyp ótti.

«Qazaqstannyń demokratııalyq damý turǵysynda joǵary maqsattardy alǵa qoıatyndyǵyn óte jaqsy bilemiz. «EKSPO-2017» halyqaralyq mamandandyrylǵan kórmesinde boldyq jáne qazaq baýyrlarymyzdyń osynaý dúnıejúzilik sharany óte joǵary deńgeıde uıymdastyrýdaǵy jetistikterine shynaıy qýanyshtymyz.  Qoryta aıtqanda, QR Parlamenti Senaty depýtattaryn saılaýyn uıymdastyrý jáne ony ótkizýge joǵary baǵamyzdy beremiz», - dedi Mustafa Isen.