TúrkPA parlamenttik dıplomatııadaǵy jańa kókjıekterge jol ashady - Senat tóraǵasy

ASTANA. KAZINFORM – Túrki memleketterdiń Parlamenttik Assambleıasynyń plenarlyq otyrysynda Parlament Senatynyń tóraǵasy Máýlen Áshimbaev parlamenttik dıplomatııany damytýdyń mańyzyna toqtaldy.

- Parlamenttik dıplomatııany odan ári nyǵaıtý da ekonomıkadan mádenıetke deıingi barlyq deńgeıdegi kooperatsııaǵa tyń serpin beretini sózsiz. Osy rette Parlamentterimiz arasyndaǵy is-qımyldy arttyrýdyń asa mańyzdy ekenin atap ótkim keledi. Bul, ásirese, Túrki memleketteri uıymy aıasynda belgilengen ekonomıkalyq, kóliktik, ekologııalyq jáne tsıfrlyq bastamalardy quqyqtyq turǵydan qamtamasyz etý isinde aıryqsha mánge ıe. Osy baǵytta bárimiz birlesip, nátıjeli jumys isteımiz dep senemin, - dedi Senat spıkeri.

Máýlen Áshimbaev baýyrlas elderdiń adamı kapıtaly úlken áleýetke ıe ekenin atap ótti.

- Shyn máninde, 160 mıllıon bilimdi, maqsaty aıqyn, mádenıeti men rýhanı ustanymy ortaq azamattarymyz – elderimizdi damýdyń shyńyna shyǵaratyn naqty kúsh. Mundaı áleýet túrki álemin damyǵan mádenı-tarıhı keńistik retinde ǵana emes, jahandyq órkenıet faktory retinde qarap, onymen sanasýǵa múmkindik beredi.

Búgingi TúrkPA otyrysy osy joldaǵy mańyzdy kezeńge jáne parlamenttik dıplomatııadaǵy jańa kókjıekterge jol ashady dep senemiz, - dedi Senat tóraǵasy. 

Buǵan deıin Qazaqstan, Ázerbaıjan, Qyrǵyzstan jáne Ózbekstan jáne Soltústik Kıpr Túrik Respýblıkasy parlamentteriniń spıkerleri Ulttyq ǵarysh ortalyǵyna baryp, ǵarysh apparattaryn qurastyrý-synaý kesheniniń jumysymen tanysqanyn jazǵan edik.