TúrkPA ókili Qazaqstandaǵy aldaǵy saılaýdyń erekshelikterin atady
«Jańa saılaý júıesinde tek partııalar atynan emes, óz-ózin usynǵan úmitkerlerdiń saılaýǵa kiretinin bildik. Bıýlletender sanynyń artýynan da da Ortalyq saılaý komıssııasynyń jumysy áldeqaıda kóbeıgenin kórip otyrmyz.
Erekshe aıtatyn jaıt – jańa partııalardyń kelýi. Partııalardyń tiziminde mindetti túrde 30 paıyz áıelder men jastar, múmkindigi shekteýli jandardan turýy kerektigi sııaqty jańa ózgertýler, jaqsartýlar bizdi erekshe qýantty», - dedi ol Ortalyq saılaý komıssııasynda ótken brıfıngide.
Sondaı-aq ol bul jolǵy Májilis quramynda Qazaqstan halqy assambleıasynyń atynan ókilder bolmaıtynyn erekshelik retinde atady.
«Taǵy bir bizge erekshe unaǵan jaıt, Qazaqstan halqy assambleıasynyń atynan taǵaıyndalatyn depýtattar Senatqa ótkendikten endi Májilis quramy 100 paıyz halyq tańdaǵan depýtattardan turatyn boldy.
Táýelsiz túrde óz-ózin usynǵan 435 úmitkerdiń tirkelýi de Qazaqstan halqynyń saılaýǵa belsendilik tanytatynyn jáne saılaý nátıjeleri Qazaqstan halqynyń shyn pikirin kórsetetinine sendiredi. 62 shet elde 77 saılaý ýchaskesiniń ashylýy da Qazaqstannyń búkil álemdegi azamattarynyń eldegi saıası is-sharalarǵa qatysa alýyna múmkindik beredi», - dedi TúrkPa ókili.
Mıssııa jetekshisi saılaýdyń Naýryz merekesine dóp kelýin jaqsylyqtyń nyshanyna balady.
«Bul saılaýdyń dál Naýryz meıramynyń qarsańynda ótkizilýi de erekshe jaıt dep oılaımyn. Saılaý nátıjesi de artynan meıramǵa ulasyp, Qazaqstan halqyna da, túrki memleketteriniń halqyna da tek paıdasyn, jaqsylyǵyn tıigzse dep tileımin. Biz óte úlken top bolyp keldik. Mıssııamyzdyń quramynda Túrkııadan Astanada 2 adam, Almatyda 1 adam, Ázerbaıjannyń atynan Astanada 2 adam, Qyrǵyzstan ókili de bizge qosylady. Jáne TúrkPA hatshylyǵynyń músheleri de bar», - dedi Redjep Sheker.
