TÚRKPA: Qazaqstandaǵy saılaý tynysh ári ashyq ótti
ASTANA. KAZINFORM – Túrki memleketteri Parlamenttik Assambleıasynyń (TÚRKPA) mıssııasy Qazaqstandaǵy saılaý barysyna oń baǵa berdi. Bul týraly TÚRKPA Quqyqtyq máseleler jáne halyqaralyq qatynastar jónindegi komıssııanyń tóraǵasy, Túrkııa Uly ulttyq májilisiniń depýtaty, mıssııa basshysy Osman Mesten málimdedi.
Onyń aıtýynsha, TÚRKPA mıssııasy 22 tamyzda Qazaqstanǵa kelip, óz mindetterin oryndaýǵa kirisken.
– Daýys berý kúni bizdiń baqylaýshylarymyz saılaý ýchaskelerine tańǵy saǵat 7:00-de kelip, keshki saǵat 20:00-ge deıin jumys istedi. Saılaý protsesi tynysh ári qolaıly jaǵdaıda ótti, – dedi Osman Mesten.
Mıssııa basshysy bul úderisti Qazaqstan men búkil qazaq halqy úshin tarıhı oqıǵa dep baǵalady.
– Bizdiń mıssııamyz Qazaqstannyń Ortalyq saılaý komıssııasy men saılaý uıymdarynyń áıelderdiń, jastardyń jáne júrip-turýy shekteýli azamattardyń saılaý protsesine qatysýyn qamtamasyz etý baǵytynda atqarǵan jumystaryn erekshe atap ótedi, – dedi ol.
Osman Mestenniń aıtýynsha, TÚRKPA baqylaýshylary birneshe saılaý ýchaskesinde monıtorıng júrgizip, daýys berý barysynyń tynysh ótkenine kóz jetkizgen.
Sonymen qatar ol saılaý komıssııalarynyń halyqtyń barlyq toptarynyń, Qazaqstannyń barlyq azamattarynyń saılaýǵa qatysýyna jaǵdaı jasaý úshin qabyldaǵan sharalary joǵary deńgeıde bolǵanyn atap ótti.
– Halyqaralyq baqylaýshylar retinde bizdiń mıssııamyz tıisti halyqaralyq standarttarǵa sáıkes osyndaı mıssııalardy ótkizý qaǵıdattaryn basshylyqqa aldy, – dep túıindedi Osman Mesten.
Aıta ketý kerek, ShYU baıqaýshylar mıssııasy Quryltaı saılaýyn demokratııalyq ári ashyq ótti dep baǵalady.
