TúrkPA baqylaýshylary referendým kúni Astana, Almaty jáne Túrkistan qalalarynda jumys isteıdi

ASTANA. KAZINFORM – Bul týraly uıymnyń bas hatshysy Ramıl Gasanov Qazaqstan Respýblıkasy Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspanmen onlaın-kezdesý barysynda málimdedi, dep habarlaıdy Kazinform agenttiginiń menshikti tilshisi. 

Bas hatshynyń aıtýynsha, TúrkPA baqylaýshylary úsh qalada — Astana, Almaty jáne Túrkistanda bolady. Uıym daýys berý rásimderiniń ashyqtyǵyn qamtamasyz etýge járdemdesýge jáne Qazaqstannyń birlestikke tóraǵalyǵy kezeńinde júzege asyrylatyn reformalardy qoldaýǵa daıyn.

Onyń sózinshe, aldaǵy konstıtýtsııalyq ózgerister tek Qazaqstan úshin ǵana emes, búkil túrki álemi úshin mańyzdy. Sebebi olar saıası turaqtylyq pen memlekettik ınstıtýttardyń damýyna qatysty máselelerdi qamtıdy.

Kezdesý barysynda taraptar uıymnyń halyqaralyq qyzmetin de talqylady.

Bas hatshy jýyrda TúrkPA delegatsııasy Venada ótken Eýropadaǵy qaýipsizdik jáne yntymaqtastyq uıymynyń Parlamenttik assambleıasy otyrysyna qatysqanyn, onda baqylaýshy mártebesin alý úshin ótinim berý rásimi aıaqtalǵanyn aıtty.

Bul bastamany ilgeriletýde Qazaqstan tarapynan qoldaý kórsetilgeni atap ótildi.

Aıgúl Quspan óz kezeginde eldegi parlamenttik júıede josparlanyp otyrǵan ınstıtýtsıonaldyq ózgerister týraly baıandap, saılaý úderisterine senimdi arttyrý úshin halyqaralyq baqylaýshylardyń qatysýy mańyzdy ekenin jetkizdi.

Sondaı-aq, sáýir aıynda Ystanbul qalasynda ótetin TúrkPA-ǵa múshe memleketter parlamentteri tóraǵalarynyń beıresmı kezdesýiniń mańyzy aıtyldy. Jıyn parlamentaralyq yntymaqtastyqty keńeıtý máselelerine arnalmaq.

Buǵan deıin Qazaqstannyń Bakýdegi elshisi Álim Baıel Ramıl Gasanovqa Qazaqstan Respýblıkasynyń Syrtqy ister mınıstri Ermek Kósherbaevtyń aldaǵy referendýmdy baqylaýǵa qatysýǵa shaqyrý hatyn tabystaǵan bolatyn.