TúrkPA baqylaýshylar mıssııasy Qazaqstandaǵy Quryltaı saılaýyna oń baǵa berdi
ASTANA. KAZINFORM — TúrkPA halyqaralyq baqylaýshylar mıssııasy Qazaqstandaǵy Quryltaı depýtattarynyń saılaýy birqalypty ári uıymdasqan jaǵdaıda ótkenin málimdedi. Baqylaýshylar saılaý barysynyń ashyqtyǵyn, barlyq sanattaǵy azamattardyń daýys berýge jasalǵan jaǵdaıdy jáne jastardyń belsendiligin erekshe atap ótti.
Saılaýdy baqylaý qorytyndysyn Túrki memleketteri Parlamenttik Assambleıasy (TMPA) mıssııasynyń basshysy Osman Mesten tanystyrdy.
Onyń aıtýynsha, mıssııa músheleri Qazaqstannyń saılaý zańnamasy men oǵan engizilgen ózgeristerdi, saılaýshylar men kandıdattardy tirkeý tártibin, saılaýaldy naýqannyń ótý barysyn, sondaı-aq saılaýdy baqylaýdy uıymdastyrý tártibin zerdelegen.
Osman Mesten bıylǵy saılaý naýqanynyń eldiń saıası damý jolyndaǵy aıryqsha mańyzyna da toqtaldy. 23 tamyzda ótken saılaý Qazaqstan bir palataly Quryltaı júıesine kóshkennen keıingi alǵashqy parlamenttik saılaý boldy.
— Mıssııa saılaý organdarynyń naýqanǵa daıyndyǵyn jáne ony ótkizý jumystaryn, sonyń ishinde saılaýdy qamtamasyz etetin azamattardy oqytý men halyqty aqparattandyrý sharalaryn oń baǵalaıdy. Biz barǵan saılaý ýchaskelerinde daýys berý uıymdasqan túrde ótti. Saılaýshylar óz tańdaýyn erkin jasap, daýys berý quqyǵyn esh kedergisiz júzege asyra aldy, — dedi Mesten.
Daýys berý kúni TúrkPA ókilderi Astana men Almatydaǵy saılaý ýchaskelerin aralyp, olardyń ashylýynan bastap daýysty sanaý protsesine deıin baqylaǵan.
Mıssııa múmkindigi shekteýli azamattardyń daýys berýine jasalǵan jaǵdaıǵa da erekshe nazar aýdardy. Baqylaýshylar saılaý ýchaskelerinde pandýstar, Braıl qarpindegi arnaıy úlgiler, sondaı-aq kórý jáne estý qabileti shekteýli azamattarǵa arnalǵan kómekshi quraldar qarastyrylǵanyn atap ótti. Ortalyq saılaý komıssııasynyń aqparattyq materıaldary men otyrystary da ymdaý tiline aýdarylǵan.
TúrkPA-nyń Qorshaǵan orta, tabıǵı resýrstar jáne densaýlyq saqtaý komıssııasynyń múshesi Mahmut Ózer Qazaqstandaǵy saılaýdy basqa elderdegi saılaý protsesterimen salystyra otyryp, eki erekshelikke basa nazar aýdardy.
Birinshisi — barlyq azamattyń daýys berý quqyǵyn júzege asyrýyna múmkindiktiń berilýi. Máselen, densaýlyǵyna baılanysty saılaý ýchaskesine bara almaıtyn azamattar men shetelde júrgen qazaqstandyqtardyń da daýys berýine tolyq jaǵdaı qarastyrylǵan. Ekinshisi — Qazaqstannyń halyqaralyq baqylaýshylar úshin ashyq bolýy.
— Daýys berý barynsha ashyq ótip, halyqaralyq baıqaýshylar úshin saılaý barysyn baqylaýǵa barlyq jaǵdaı jasaldy, — dep túıindedi Ózer.
Aıta keteıik, buǵan deıin TMD mıssııasy Quryltaı saılaýy ádil ári ashyq ótkenin málimdegen edi.
