TúrkPA: Astanada túrki álemine ortaq qundylyqtardy saqtaý máseleleri talqylandy
«Jıynda TúrkPA-ǵa múshe elderdegi joǵary bilim berý salasyndaǵy ekvıvalenttik protsester, túrki álemine ortaq qundylyqtar men tarıhı-mádenı muralaryn saqtaý jáne qorǵaý, basqa da máseleler qaraldy. 1 naýryzda ótken otyrysqa Májilis depýtattary, Ázerbaıjan, Qyrǵyzstan, Túrkııa elderiniń parlamentshileri, TúrkPA Quqyqtyq máseleler jáne halyqaralyq qatynastar jónindegi komıssııa músheleri, múshe-parlamentterdiń zań departamentteriniń ókilderi, túrki yntymaqtastyq uıymdarynyń ókilderi qatysty», - delingen habarlamada.
2014 jylǵy 18 naýryzda Ystanbulda ótken birinshi semınarda taraptar Eýropalyq odaq pen Táýelsiz Memleketter Dostastyǵy Parlamentaralyq assambleıasy kontekstinde óz tájirıbelerimen bólisti.
Al 2016 jylǵy 18 naýryzda Ankarada ótken ekinshi semınarda, taraptar óz elderindegi otyrystyń ataýyna qatysty qoldanystaǵy quqyqtyq bazamen, ıaǵnı mádenı baılyqty saqtaý jáne damytý boıynsha birlesken zańnamalyq kúsh-jigermen bólisip, mádenıet jáne týrızm salasyndaǵy naqty taqyryptar boıynsha jumysty jalǵastyrýdy sheshti.
Al, búgingi ótken sharanyń maqsaty - zańnamany úılestirý úderisin jaqsartý úshin naqty taqyryptary men kúntizbelik jospary bar jol kartasyn anyqtaý. Otyrys barysynda Túrkııa Respýblıkasy Ulttyq jınalysynyń sarapshysy Erdjan Dýrdýlar túrki áleminiń materıaldyq emes mádenı murasyn qorǵaý týraly modeldik zańmen tanystyrdy. Ázerbaıjan Respýblıkasy Mıllı Medjlısiniń Memlekettik qurylys zańnamasynyń dırektsııasy basshysynyń orynbasary Fýad Mammadov, Túrki Akademııasynyń prezıdenti Darhan Qydyráli taqyryp boıynsha baıandady. Sonymen qatar, osy kúni parlamentshiler TúrkPA Quqyqtyq máseleler jáne halyqaralyq qatynastar jónindegi komıssııasynyń jetinshi otyrysynyń jumysyna qatysty. Onda TúrkPA-ǵa qatysýshy-elderdegi joǵary bilim berýdegi balamalylyq úderisteriniń máseleleri talqylandy. Baıandamashylar joǵary bilimniń turaqty ekonomıkalyq jáne áleýmettik damýdaǵy róline erekshe toqtaldy.
«Osy oraıda TúrkPA-ǵa qatysýshy elderdiń sapaly da, sandyq jaǵynan joǵary bilim berýdiń jaqsy damyǵan jáne ozyq júıeleri bar ekendigi aıtyldy. TúrkPA-ǵa qatysýshy elder quqyqtyq jáne ınstıtýtsıonaldyq sheńberlerin nyǵaıta otyryp, ózderiniń jeke oqý júıelerin ári qaraı damytyp, joǵary bilimdi jaqsartýǵa úlken úles qosa alatyny atap ótildi. Talqylaý qorytyndysy boıynsha tıisti usynymdar qabyldandy», - delingen habarlamada.
