TúrkPA: Almatylyqtardyń saılaý ýchaskesine balalaryn ertip barýy - jaqsy dástúr

ALMATY. QazAqparat - TúrkPA mıssııasynan Qazaqstanǵa barlyǵy 20 baıqaýshy keldi, onyń 8-i depýtat, 12-si dıplomat. Bul týraly Túrkııa Bas Ulttyq Assambleıasynyń depýtattary Rejep Sheker men ıÝksel Ózqan, TúrkPA komıssııasynyń hatshysy Enes Iyldyrym, TúrkPA halyqaralyq qatynastar jáne hattama departamentiniń qyzmetkeri Abdýllah Nýrı Aıvaz jáne TúrkPA baılanys ofıtseri Tahmına Bakıeva qatysqan baspasóz máslıhatynda málim boldy, dep habarlaıdy QazAqparat tilshisi.

«Mıssııadan respýblıkaǵa barlyǵy 20 baıqaýshy keldik, onyń 8-i depýtat, 12-si dıplomat. Biz Astana jáne Almaty qalalaryndaǵy saılaýdy baqyladyq. Qazaqstan astanasynda QR OSK tóraǵasy Nurlan Ábdirovpen, QR Parlamenti Senatynyń spıkeri Máýlen Áshimbaevpen, QR Parlamenti Májilisiniń tóraǵasy Erlan Qoshanovpen, Syrtqy ister mınıstriniń orynbasary Ádil Tursynovpen kezdestik»,- dedi Rejep Sheker.

Sondaı-aq, TúrkPA baıqaýshylary saıası naýqannyń qalaı ótkenin aıtyp berdi.

«Astana men Almatydaǵy kóptegen saılaý ýchaskelerine bardyq. Saılaýshylarmen, baıqaýshylarmen, saılaý komıssııasy múshelerimen sóılestik. Bizge saılaý komıssııasy múshelerimen birge múmkindigi shekteýli jandardyń úıine barýǵa múmkindik berildi. Qazaqstanda saılaýshylarǵa usynylatyn osy qyzmetti óte joǵary baǵaladyq», - dedi ol.

TúrkPA ókili prezıdent saılaýy ashyq ári ádil ótkenin tilge tıek etti.

«Bizdiń delegatsııa halyqaralyq baıqaýshylardyń jumys isteýine jasalǵan jaǵdaıdy joǵary baǵalaıdy. Saılaý protsesin uıymdastyrýda eleýli kemshilikter anyqtalǵan joq. Bizdi tań qaldyrǵan jáne qýantqan dúnıe - saılaý komıssııasynyń múmkindigi shekteýli jandarǵa qolaıly jaǵdaı jasaý úshin olardyń úıine barǵany», - dedi Rejep Sheker.

Sondaı-aq, TúrkPA mıssııasynyń ókilderi ata-analardyń balalarymen birge daýys berýge kelgenin erekshe atap ótti.

«Kishkentaı kezinen bastap balalardy saılaý protsesine qatysýǵa úıretý – óte jaqsy dástúr»,- deıdi olar.