Týrkody bar qazaqstandyq týrıst qandaı basymdyqqa ıe
«Týrıstik qamqor» qory - bul saqtandyrý kompanııasy emes. Medıtsınalyq sıpattaǵy saqtandyrý jaǵdaılaryna «Saqtandyrý týraly» zań boıynsha saqtandyrý kompanııalary jaýap beredi. Al qor bolsa týrıstik paketke enetin temir jol nemese áýe bıletinsiz qalǵan jaǵdaıda qazaqstandyq týrısti otanyna qaıtarý jumysymen aınalysady», - deıdi Ásel Núrkebaeva OKQ-da ótken baspasóz máslıhatynda.
Ol óz sózinde qazaqstandyqtarǵa demalys kezinde erekshe jiti bolýdy, qymbat otelderdegi arzan joldama jaıly usynystarǵa senbeýge shaqyrdy.
«Tym qymbat otelderge arzan týr usynylsa, durystap oılanyp alǵan jón. Bul eń aldymen árbir adamnyń, ıaǵnı qyzmetti alatyn klıenttiń jaýapkershiligi. Lıýksty ári bes juldyzdy otelderdiń arzan turmaıtyny aıdan anyq. Bul jaıdy árkim de eskerýi kerek. Odan keıin siz birden jetkennen keıin týragenttikten kelisimdi talap etýińiz kerek», - deıdi ol.
Al óz kezeginde «Týrıstik Qamqor» korporatıvtik qorynyń tóraıymy Inna Reı demalysy kútkendegideı bolmaǵan qazaqstandyqtarǵa óz quqyǵyn qorǵaý kerektigin aıtady.
«Eger tólengen aqyǵa saı bolmaıtyn qyzmettiń kórsetilgenin týrıst dáleldeı alsa, týragentke shaǵym bildirgenińiz jetip jatyr. Týragent bul máseleni týroperatormen birge sheshkisi keledi. Eger másele sheshilmese, sotqa júginý kerek. Sebebi, sizge kórsetilgen qyzmettiń sapasy men deńgeıine týroperator tolyǵymen jaýap beredi», - deıdi ol.
Aıta ketsek, týrıstik kod 11-13 áriptik-sandyq sımvoldan turady. Ol árbir joldamany resimdegen kezde avtomatty túrde barlyq týrısterge beriledi. Bul shıfrdyń ár týrıst úshin mańyzy zor. Týrkod agenttiń elektrondy poshtasyna joldanady. Týrkod «Týrıstik Qamqor» korporatıvtik qorynyń elektrondy tiziminde saqtalady. Shuǵyl jaǵdaılar týyndaǵan kezde týrıst óziniń týrkodyn aıtyp berip, kómek suraı alady.
Týrfırma arqyly shetelde demalýdy jón kóretin barlyq adamǵa týrkod beriledi. Eger týrıst týrfırma arqyly resimdese, ol mindetti túrde týrkod alýy kerek. Demek, týroperatorlar týrpaketti bere otyryp, olarmen birge týrkodtardy berýi tıis.
«Týrıstik Qamqor» korporatıvtik qory jumysyn bastaǵaly beri 380 myń adamǵa týrıstik kod berilgen.
Eske sala ketsek, Qazaqstan týragentter qaýymdastyǵynyń prezıdenti Ásel Núrkebaeva buǵan deıin Qazaqstanda jaýapty týragenttikterdiń tizimi jasalatynyn habarlaǵan bolatyn.
Sonymen qatar, QR Mádenıet jáne sport mınıstrligi Týrızm ındýstrııasy komıteti jaýapsyz týrıstik operatorlarǵa sońǵy eskertý jasap otyr. ıAǵnı, «Týrıstik Qamqor» korporatıvtik qoryna enbegen týroperatorlarǵa budan bylaı aıyppul salynbaq.
