Týrkod pen kepildikter: qazaqstandyq týrıster shetelde qalaı qorǵalady
ASTANA. KAZINFORM — «Týrıstik qamqor» korporatıvtik qorynyń jáne Týroperatorlar qaýymdastyǵynyń tóraıymy Inna Reı BIZDIÑ ORTA podkastynda týroperatorlardyń qyzmetterine kepildik beretin júıe qurylǵanyn atap ótti.
— Júıe engizilgen sátten bastap salada bankrottyq bolǵan joq. Buryn mundaı jaǵdaılar jıi kezdesetin: kompanııa qyzmetin toqtatyp, adamdar shetelde qalyp qoıatyn. Ekinshiden, júıe daǵdarys jaǵdaılarynda da tıimdiligin kórsetti. Taıaý Shyǵystaǵy oqıǵalar men pandemııa — onyń aıqyn mysaly. Statıstıkaǵa súıensek, bes kúnniń ishinde 11 myń adam elge qaıtaryldy. Bul rettelgen tetiktiń arqasynda júzege asty. Sonymen qatar júıe memlekettik bıýdjetke salmaq túsirmedi, ıaǵnı bir tıyn da qazyna qarajaty jumsalmady, barlyǵy týroperatorlardyń qarajaty esebinen qamtamasyz etildi, — dedi sarapshy.
Inna Reıdiń aıtýynsha, júıeniń tıimdiligin arttyratyn taǵy bir mańyzdy faktor — ony naryq qatysýshylarynyń ózderi basqarýy. Bul bıznestiń «kóleńkeden shyǵýyna» jáne salanyń ashyqtyǵyn arttyrýǵa eleýli úles qosady.
Sarapshy Qazaqstanda shamamen 10 jyldan beri qoldanylyp kele jatqan týrkodtar júıesine de erekshe toqtaldy.
— Kez kelgen tótenshe jaǵdaı kezinde bizde týrısterdiń qaıda ekeni, olardyń sany týraly naqty aqparat bar. Sondaı-aq, olardy elge qaıtarýǵa qajetti resýrstar da daıyn. Týrkodtyń bar-joǵyn tekserý jetkilikti, — dep túsindirdi ol.
Sarapshynyń pikirinshe, eger týrıst ornalastyrý nemese servıspen baılanysty qıyndyqtarǵa tap bolsa, júıe arqyly barlyq qajetti aqparatty alý, baılanysqa shyǵý múmkindigi qarastyrylǵan.
Buǵan deıin elimizde týrızm salasynda kásibı mamandardyń jetispeıtinin jazǵan bolatynbyz.
