Túrikmenstan men Aýǵanstan transshekaralyq sýdy paıdalaný máselelerin talqylady

ASTANA. KAZINFORM – Ashhabadta túrikmen-aýǵan bıznes-forýmy aıasynda taraptar óńirdiń sý ortasyn tıimdi paıdalanýdyń negizgi tásilderi men qaǵıdattaryn talqylady, dep habarlaıdy Túrikmenstan Syrtqy ister mınıstrligi.

Túrikmen tarapy tatý kórshilik, ózara qurmet jáne halyqaralyq quqyq rýhynda sý dıalogyna beıildiligin bildirdi. Aımaqtaǵy barlyq memleketterdiń múddelerin eskere otyryp, sý resýrstaryn júıeli paıdalaný jáne sý sharýashylyǵy máselelerin keshendi sheshý boıynsha bastamalardy belsendi ilgeriletý máselesi atap ótildi. Elde sý resýrstaryn tıimdi paıdalaný jáne sýdy únemdeıtin tehnologııalardy engizý boıynsha júıeli jumystar júrgizilip jatyr. 

Óz kezeginde, Aýǵanstannyń Ónerkásip jáne saýda mınıstriniń m.a. Nýrýddın Azızı de transshekaralyq gıdroresýrstardy paıdalaný men sý obektilerin salýda Kabýl kórshi eldermen ózara kelisim men teń quqyqtylyq qaǵıdattaryna súıenetinine sendirdi. 

Bıznes-forým barysynda taraptar agroónerkásiptik keshen men aýyl sharýashylyǵyn yntymaqtastyqtyń perspektıvaly baǵyttary retinde belgilep, osy basym baǵyttar boıynsha jańa áriptestik ornatý múmkindikterin talqylady.