Túrikmenstannyń eks-prezıdenti sý jáne energetıka máseleleri jóninde pikir bildirdi
ASTANA. KAZINFORM — Túrikmenstan Halk Maslahatynyń tóraǵasy Gýrbangýly Berdimuhamedov sý jáne energetıka máseleleri boıynsha eldiń ustanymyn jarııalady, dep habarlaıdy Kazinform agenttiginiń menshikti tilshisi.
Memlekettik TDH jańalyqtar portalynda jarııalanǵan suhbat barysynda Gýrbangýly Berdimuhamedov óńirdegi ózekti máseleler, ásirese sý tapshylyǵy jóninde pikir bildirdi.
— Ashyq aıtatyn bolsaq, bul — óńir úshin óte úlken másele. Biz buǵan deıin de Ortalyq Azııadaǵy sý problemasyn qarastyrǵanda úsh negizgi qaǵıdany usynǵanbyz.
Birinshiden, halyqaralyq quqyq normalaryn saqtaý. Bul sý resýrstary búkil adamzattyń ortaq ıgiligi ekenin bildiredi. Osyǵan sáıkes, sýdy paıdalaný jalpyǵa tanylǵan normalarǵa, BUU konventsııasyna sáıkes júzege asyrylýy tıis.
Ekinshiden, ózara múddelerdi eskerý. Bul sý resýrstaryn paıdalanýda barlyq eldiń halyqtarynyń múddelerin nazarǵa alý qajettigin bildiredi. Tek osyndaı tásil ádiletti jáne turaqty damýdy qamtamasyz etedi.
Úshinshiden, bul protseske halyqaralyq qurylymdardy, eń aldymen BUU-ny tartý, — dep atap ótti Túrikmenstan Halk Maslahatynyń tóraǵasy.
Onyń aıtýynsha, Túrikmenstan Ortalyq Azııa elderinde sý resýrstaryn paıdalaný tetikterin qalyptastyrý maqsatynda Óńirlik sý paıdalaný keńesin qurýdy usynady. Sondaı-aq, Túrikmenstan Amýdarııa jáne Syrdarııa ózenderi boıynsha BUU konventsııalaryn qabyldaýdy qoldaıtynyn bildiredi.
Energetıkalyq yntymaqtastyqqa toqtalǵan eks-prezıdent Túrikmenstannyń birqatar mańyzdy ekonomıkalyq jobalardy júzege asyryp jatqanyn atap ótti. Olardyń qatarynda Túrikmenstan-Aýǵanstan-Pákistan-Úndistan (TAPI) gaz qubyry, temirjol qurylysy, sondaı-aq elektr jelileri men baılanys ınfraqurylymyn damytý jobalary bar.
— Túrikmenstan tabıǵı gaz jetkizý máselesi boıynsha eýropalyq seriktestermen tyǵyz jumys isteýge daıyn. Bul baǵyttaǵy yqtımal qadamdardyń biri — Transkaspıı baǵytyn iske asyrý. Biz árdaıym Kaspıı aımaǵynda tolyqqandy energetıkalyq áriptestik ornatýdy qoldadyq, sonyń ishinde Batys baǵytyna sý asty qubyrlaryn tartýdy da jaqtaımyz. Bul — bizdiń zańdy quqyǵymyz, ol Kaspıı teńiziniń quqyqtyq mártebesi týraly Konventsııada bekitilgen, — dedi Gýrbangýly Berdimuhamedov.
Túrikmenstan Halk Maslahatynyń tóraǵasy energoresýrstardy jetkizýmen shektelmeı, «jasyl» energetıka salasynda birlesken jobalardy bastaý jáne Eýropaǵa elektr energııasyn jetkizý bastamasyn qoldaıtynyn aıtty.
— Qazirgi ýaqytta Kaspıı teńiziniń Túrikmenstanǵa tıesili jaǵalaýynda 1 574 megavatt qýattylyqqa ıe elektr stantsııasynyń qurylysy júrgizilýde. Elektr jetkizý jelileri ótetin memleketterdiń úılestirilgen kúsh-jigerimen bul joba jaqyn arada ózara tıimdi negizde júzege asady dep senemin, — dep málimdedi ol.
Buǵan deıin Túrikmenstan men Grýzııanyń kólik dálizderin damytý jóninde kelisimge kelgeni habarlanǵan bolatyn.
Aıta ketelik Túrikmenstanǵa TúrkPA quramyna kirý usynyldy.