Túrikmenstannan gazdy nelikten júıeli túrde satyp ala almaı otyrmyz

ASTANA. KAZINFORM – Búgin Senattyń jalpy otyrysynda palata spıkeri Máýlen Áshimbaev Túrikmenstannan gaz satyp alý máselesine toqtaldy.

- Túrikmenstan óńirde, jalpy álemdik deńgeıde gaz óndiretin úlken memleketterdiń biri desek bolady. Qazir ózimizdiń gaz qorlarymyzdy damytý úshin jumys istep jatyrmyz. Biraq, gazdyń jetkiliksizdigi baıqalyp qalady. Sondyqtan Túrikmenstan tarapymen gaz satyp alýǵa baılanysty kelissózder júrip jatyr. Soǵan baılanysty aldaǵy ýaqytta naqty kórsetkishterge qol jetkizesizder me? Osyndaı kelissózder aıasyndaǵy eń negizgi túıtkilder qaı baǵytta? Nege biz kórshi memleketten gazdy júıeli túrde satyp ala almaı otyrmyz? Negizgi sebebi ne? - dep surady Senat spıkeri Máýlen Áshimbaev Syrtqy ister mınıstriniń orynbasary Álibek Qýantyrovtan.

Osy oraıda mınıstr orynbasary Qazaqstan men Túrikmenstan arasynda gaz salasyndaǵy basty máseleni atady.

- Gaz salasyndaǵy úlken seriktesterimizdiń biri – Túrikmenstan. Bizge gaz ken oryndarymyzdan ǵana emes, Túrikmenstannan da kerek. Ásirese, Batys Qazaqstan, Mańǵystaý oblystar men ońtústik aımaqtarǵa. Sol sebepti qazir «QazaqGaz» kompanııasy Túrikmenstannyń «Túrikmengaz» memlekettik kontsernimen jumys istep jatyr. Sebebi ózimizdiń gaz jetkiliksiz. Túrikmenstanmen ınvestıtsııalardy ózara kótermeleý jáne qorǵaý týraly kelisim bolmady. Atalǵan kelisim gaz salasyndaǵy máselelerdi sheshýge arnalǵan, - dedi Álibek Qýantyrov.