Túrkimenstan sheteldikter úshin elektrondy vıza engizdi
AShHABAD. KAZINFORM - Túrkimenstanda «Mıgratsııa týraly» zańǵa ózgerister men tolyqtyrýlar engizildi. Tıisti jarlyqqa prezıdent Serdar Berdimuhamedov qol qoıyp, resmı jarııalanǵan kúninen bastap, ıaǵnı 2025 jyldyń 18 sáýirinde kúshine endi, dep habarlaıdy Turkmenportal.com «Neıtralnyı Týrkmenıstan» gazetine cilteme jasap.
Jańa túzetýlerge sáıkes, elektrondy vıza (e-Visa) Túrkimenstannyń memlekettik mıgratsııa qyzmetiniń aqparattyq júıesinde elektrondy túrde beriletin qujat retinde anyqtalady. Bul qujat sheteldikterge elge kirýge, onyń aýmaǵynda qalýǵa, ketýge jáne Túrkimenstan arqyly tranzıtpen ótýge múmkindik beredi.
Mańyzdy jańalyq elektrondy vıza alý kezinde elge kelýge shaqyrý qaǵazyn berý qajettiliginiń joıylýy boldy. Onyń ornyna júıe Túrkimenstannyń dıplomatııalyq ókildikterine, konsýldyq mekemelerine jáne mıgratsııa qyzmeti organdaryna avtomatty túrde habarlama jiberedi.
Elektrondyq vızalardyń sanattary men túrlerin, olardy tirkeý, berý jáne qoldaný merzimin uzartý tártibin tikeleı Túrkimenstan prezıdenti belgileıdi. Elektrondyq ótinishterdiń pishinin, qajetti qujattar tizbesin jáne elektrondyq vızalardyń úlgilerin memlekettik mıgratsııa qyzmeti bekitedi.
Bul jańashyldyq vıza rásimderin jeńildetý jáne Túrkimenstandy sheteldik týrıster men bıznesmender úshin qoljetimdi etýdi kózdeıdi.
Eske sala keteıik, Túrkimenstan prezıdenti Qadir túni qurmetine 321 sottalýshyǵa raqymshylyq jasaǵany jaıly jazǵan edik.