Túrikmenstan Prezıdentiniń Qazaqstanǵa saparynda qandaı kelissózder ótedi

ASTANA. KAZINFORM — QR Syrtqy ister mınıstrliginiń resmı ókili, Halyqaralyq aqparat komıtetiniń tóraǵasy Aıbek Smadııarov Túrikmenstan Prezıdentiniń Qazaqstanǵa memlekettik saparynda qaı salalarda kelissózder júrgiziletinin aıtty. 

Sapar baǵdarlamasynda joǵary deńgeıdegi kelissózder kózdelgen, onyń barysynda taraptar Qazaqstan men Túrikmenstan arasyndaǵy strategııalyq seriktestikti odan ári nyǵaıtý perspektıvalaryn qarastyrady.

— Saýda-ekonomıkalyq jáne kóliktik-logıstıkalyq yntymaqtastyqty keńeıtýge, energetıka salasyndaǵy ózara is-qımylǵa, sondaı-aq mádenı-gýmanıtarlyq almasýlar máselelerine erekshe nazar aýdarylatyn bolady. Óńirlik qaýipsizdik pen halyqaralyq uıymdardaǵy kúsh-jigerdi úılestirýdiń ózekti aspektileri talqylanady dep kútilýde, — dedi QR SІM resmı ókili elordada ótken brıfıngte.

Kelissózder qorytyndysy boıynsha qazaq-túrikmen yntymaqtastyǵyn tereńdetýge baǵyttalǵan birqatar ekijaqty qujattarǵa qol qoıý josparlanyp otyr.

Aıta keteıik, Qazaqstan Prezıdenti Qasym-Jomart Toqaevtyń shaqyrýymen Astanaǵa memlekettik saparmen Túrikmenstan Prezıdenti Serdar Berdimuhamedov keldi.

Sońǵy otyz jyldan asa ýaqyt ishinde Astana men Ashhabad saıası, ekonomıkalyq jáne kólik-logıstıkalyq salalardy qamtıtyn ózara yntymaqtastyqty turaqty damytty.