Túrikmenstan Prezıdenti sý resýrstary boıynsha óńirlik keńes qurýdy usyndy
ASTANA. KAZINFORM – Túrikmenstan Prezıdenti Serdar Berdymuhamedov óńirlik ekologııalyq sammıtte transshekaralyq sý resýrstaryn tıimdi ári ádil paıdalaný máselesine erekshe nazar aýdardy.
Onyń aıtýynsha, Ortalyq Azııa elderi búginde sý tapshylyǵy, jerdiń tozýy, shóleıttený jáne bıoalýantúrliliktiń azaıýy sııaqty ózara baılanysty kúrdeli ekologııalyq syn-qaterlermen betpe-bet kelip otyr.
Osyǵan baılanysty Prezıdent transshekaralyq ózenderdi paıdalaný ortaq ári naqty qaǵıdattarǵa súıenýi tıis ekenin atap ótti.
— Birinshiden, halyqaralyq konventsııalar men kelisimderdi qatań saqtaý qajet. Ekinshiden, barlyq memleketterdiń múddesi teń dárejede eskerilýi tıis. Úshinshiden, bul úderiske halyqaralyq uıymdar, eń aldymen Birikken Ulttar Uıymy belsendi qatysýy qajet, — dedi Serdar Berdymuhamedov.
Ol sý resýrstaryn tıimdi basqarý úshin óńirlik deńgeıde úılestirýdi kúsheıtý mańyzdy ekenin aıtyp, arnaıy qurylym qurýdy usyndy.
— Osyǵan oraı, Ortalyq Azııa elderiniń sý resýrstaryn paıdalaný máseleleri boıynsha óńirlik keńes qurýdy usynamyz. Bul bastama elder arasyndaǵy ózara is-qımyldy júıeleýge múmkindik beredi, — dedi ol.
Sonymen qatar, Túrikmenstan basshysy óńirdegi iri ekojúıelerdiń jaı-kúıine de toqtaldy. Atap aıtqanda, Kaspıı teńiziniń ekologııalyq ahýalyn saqtaý barlyq jaǵalaýdaǵy memleketter úshin ortaq mindet ekenin atap ótti.
Osy rette ol Aral teńizi máselesin de nazardan tys qaldyrmady. Prezıdenttiń sózinshe, bul baǵyttaǵy jumysty jandandyrý – óńir elderiniń ortaq jaýapkershiligi.
— Araldy saqtaý – barshamyzǵa ortaq mindet. Sondyqtan Araldy qutqarý halyqaralyq qory aıasyndaǵy jumysty kúsheıtý qajet, — dedi Serdar Berdymuhamedov.
Aıta keteıik, buǵan deıin Qyrǵyzstan Qazaqstanmen jáne ózge kórshilerimen ekologııalyq qaýipsizdikti qamtamasyz etýge daıyn ekenin jazǵanbyz.
