Túrikmenstan prezıdenti Beıbitshilik pen senim jylynyń qurmetine 247 adamǵa raqymshylyq jasady

ASTANA. KAZINFORM — Túrikmenstan prezıdenti Serdar Berdimuhamedov Halyqaralyq beıbitshilik pen senim jylyna oraı 247 sottalǵanǵa raqymshylyq jasaý týraly jarlyqqa qol qoıdy, dep habarlaıdy TDH.

Eldiń Mınıstrler kabınetiniń otyrysy barysynda Túrikmenstan prezıdenti janyndaǵy Azamattyq jáne keshirim jasaý máseleleri boıynsha usynystardy daıyndaý jónindegi komıssııanyń tóraǵasy Begench Gýndogdyev vedomstvo jumysynyń qorytyndysy týraly baıandady. Esepti tyńdaǵan memleket basshysy Halyqaralyq beıbitshilik pen senim jylyna oraı 247 azamatqa raqymshylyq jasaý týraly jarlyqqa qol qoıdy.

Memleket basshysy komıssııa tóraǵasyna quqyq qorǵaý organdarynyń basshylarymen birge sottalǵandardy bas bostandyǵynan aıyrý oryndarynan bosatý jáne jaqyn arada otbasylaryna qaıtarý boıynsha qajetti jumystardy júrgizýdi tapsyrdy.

Túrikmenstan prezıdenti raqymshylyq jasalǵan azamattarǵa Otanǵa adal qyzmet etip, adal eńbektiń jemisin kórip ómir súrýdi tiledi.

Eske sala keteıik, Túrikmenstan prezıdenti Qadir túni qurmetine 321 sottalýshyǵa raqymshylyq jasaǵany jaıly jazǵan edik.