Túrikmenstan Prezıdenti «Altyn qyran» ordenimen marapattalady

ASTANA. KAZINFORM — Memleket basshysy Qasym-Jomart Toqaev 12 jeltoqsanda Ashhabadta ótetin Halyqaralyq beıbitshilik jáne senim forýmyna qatysady. Bul týraly Qazaqstan Prezıdenti elimizge memlekettik saparmen kelgen Túrikmenstan Prezıdenti Serdar Berdimuhamedovpen keńeıtilgen quramdaǵy kelissóz barysynda aıtty.

- Qazirgi zamanǵy Túrikmenstandy basqarýdaǵy eńbegińizdi joǵary baǵalaıtynymyzdy aıtqym keledi jáne Sizdiń myqty kóshbasshylyǵyńyzdyń arqasynda elińizdiń ekonomıkasy qarqyndy damyp, Túrikmenstannyń halyqaralyq arenadaǵy bedeli artýda. Osy múmkindikti paıdalana otyryp, Sizdi jáne Siz arqyly búkil baýyrlas túrikmen halqyn Túrikmenstannyń turaqty beıtaraptyǵynyń 30 jyldyǵymen quttyqtaǵym keledi. Ashhabadtyń beıbitsúıgish saıasattyn, sondaı-aq óńirdegi turaqtylyq pen ornyqty damýdy qamtamasyz etýdegi ortaq maqsatty ilgeriletýge baǵyttalǵan Sizdiń jasampaz bastamalaryńyzdy tolyq qoldaımyz, - dedi Prezıdent.

Osy oraıda Memleket basshysy Túrikmenstannyń BUU qoldaýymen Halyqaralyq beıbitshilik jáne senim jyly aıasynda tabysty ótkizip jatqan keń aýqymdy is-sharaǵa aıryqsha nazar aýdardy. 

- 12 jeltoqsanda ótetin Úlken halyqaralyq forýmǵa qatysý úshin barýdy josparlap otyrmyn. Qurmetti Prezıdent myrza, Qazaqstan-Túrikmenstan qatynastaryn nyǵaıtýǵa qosqan zor úlesińizdi eskere otyryp, men Sizdi Qazaqstan Respýblıkasynyń eń joǵary memlekettik nagradasy — «Altan qyran» ordenimen marapattaý týraly sheshim qabyldaǵanymdy habarlaǵym keledi. Bul joǵary marapat Sizge, sondaı-aq búkil baýyrlas túrikmen halqyna degen tereń qurmetti bildiredi, - dedi Qasym-Jomart Toqaev.

Buǵan deıin Memleket basshysy Qasym-Jomart Toqaev Túrikmenstan Prezıdentin Aqordada qarsy alǵanyn jazǵan edik.