Túrikmenstan men Tájikstannyń Syrtqy ister mınıstrlikteri «bir Qytaı» qaǵıdatyn qoldady

ASTANA. KAZINFORM – Túrikmenstan men Qytaıdyń syrtqy saıasat vedomstvolary Taıvanda ótken saılaýǵa qatysty óz ustanymyn bildirdi. 

«Turaqty beıtaraptyq mártebesine ıe Túrikmenstan óziniń syrtqy saıasatyn halyqaralyq quqyq normalaryn qatań saqtaı otyryp júrgizedi.
Negizgi qaǵıdattarynyń biri memleketterdiń aýmaqtyq tutastyǵyn qurmetteý bolǵan Birikken Ulttar Uıymynyń Jarǵysyna súıene otyryp, Túrikmenstan «bir Qytaı» qaǵıdatyn tolyq qoldap, Qytaı Halyq Respýblıkasynyń úkimeti búkil Qytaıdyń jalǵyz zańdy úkimeti ekenin rastaıdy», - dep habarlady Túrikmenstan Syrtqy ister mınıstrliginen.

Dál osyndaı ustanymdy Tájikstan SІM de bildirdi.

«2024 jyldyń 13 qańtarynda Qytaı Taıvanynda ótken saılaýǵa baılanysty Tájikstan «bir Qytaı» saıasatyn tabandy túrde qoldap, Qytaı Halyq Respýblıkasynyń úkimetin búkil Qytaıdyń jalǵyz zańdy jáne ókiletti úkimeti dep sanaıdy. Tájikstan Taıvandi Qytaı aýmaǵynyń ajyramas bóligi retinde tanı otyryp, osy dostas eldiń ishki isterine syrttan aralasý áreketterine tabandy túrde qarsy», - dep qorytyndylady vedomstvodan.

Eske sala ketsek, 13 qańtarda Taıvanda prezıdent saılaýy ótti. Onyń qorytyndylary boıynsha bıliktegi Demokratııalyq progressıvti partııanyń (DPP) kandıdaty Laı Tsınde jeńiske jetti. Dástúrli túrde araldyń tolyq táýelsizdigin jaqtaıtyn Laı 40,1% daýys jınady. OSK málimetinshe, saılaýǵa qatysýshylar úlesi 69,8 paıyzdy qurady.

Birqatar el bul máselege qatysty óz ustanymdaryn bildirip úlgerdi. Qazaqstan men Ázerbaıjan Qytaıdyń tutastyǵyn qoldaıtynyn málimdedi.