Túrikmenstan maınıng pen krıptovalıýta bırjalarynyń qyzmetin zańdastyrdy

ASTANA. KAZINFORM — Túrikmenstan Prezıdenti Serdar Berdimuhamedov «Vırtýaldy aktıvter týraly» zańǵa qol qoıdy, ol 2026 jyldyń 1 qańtarynan bastap elde maınıng pen krıptovalıýta bırjalarynyń qyzmetin zańdastyrady, dep jazdy The Crypto Times.

Zań vırtýaldy aktıvterdi azamattyq quqyq obektisi retinde anyqtaıdy, biraq olardy tólem quraly nemese valıýta retinde moıyndamaıdy. Maınıngpen jeke kásipkerler men kompanııalar aınalysa alady, biraq olar mindetti túrde Ortalyq bankke tirkelip, qaýipsizdik talaptaryn oryndaýy tıis, bul zańsyz maınıngti boldyrmaýǵa múmkindik beredi.

Krıptovalıýta bırjalary men basqa da vırtýaldy aktıvter qyzmetin kórsetetin uıymdar Ortalyq banktiń lıtsenzııasy boıynsha jumys isteıdi, al ámııandardy ashý tek tolyq klıenttiń sáıkestendirilýinen keıin ǵana júzege asady.

Qujatta krıptoproektilerdiń ataýlarynda «Túrkmenstan», «memlekettik», «ulttyq» sózderin qoldanýǵa shekteýler engiziledi jáne jarnamaǵa qatysty qatań erejeler belgilenedi. Jarnamada krıptovalıýtalarmen operatsııalardyń qaýipteri týraly eskertý bolýy tıis, sondaı-aq olardy jeńil nemese kepildendirilgen tabys retinde kórsetýge tyıym salynady.

Memleket sondaı-aq tsıfrlyq aktıvterdi joǵaltý nemese qunsyzdaný múmkindikteri úshin jaýapty bolmaıtynyn málimdedi.

Ekspertterdiń pikirinshe, jańa zań Túrkmenstannyń tsıfrlyq ekonomıkasyn damytý jáne vırtýaldy aktıvter tehnologııasyn qoldaný úshin baqylaýǵa alynǵan quqyqtyq orta qurý baǵytyndaǵy strategııalyq qadamdardyń bir bóligi. 

Qarasha aıynyń ortasynda INTEGRA CITY halyqaralyq kompanııalar toby Ashhabadta ótken Turkmentel 2025 halyqaralyq kórmesinde «aqyldy» jáne turaqty qalalarǵa arnalǵan tsıfrlyq sheshimderin tanystyrdy.

Buryn Qazaqstan Prezıdenti Túrkmenstanmen ınvestıtsııalardy qorǵaý týraly kelisimdi ratıfıkatsııalaý týraly zańǵa qol qoıǵan bolatyn.