Túrikmenstan halyqaralyq munaı-gaz forýmynda ınvestıtsııalyq múmkindikterin tanystyrdy
ASTANA. KAZINFORM — Túrikmenstannyń Saýda-ónerkásip palatasynda «Túrikmenstannyń munaıy men gazy – 2026» atty halyqaralyq konferentsııa men kórme jumysyn bastady, dep habarlaıdy TDH.
Jyl saıyn ótkiziletin halyqaralyq konferentsııa men kórme Túrikmenstannyń otyn-energetıka kesheniniń jetistikterin tanytýǵa arnalǵan tıimdi alań sanalady. Sondaı-aq ol tikeleı ári nátıjeli baılanystar ornatý, jańa jobalardy iske asyrý jáne álemdik tájirıbemen tanysý sııaqty mańyzdy mindetterdi sheshýge yqpal etedi.
Túrikmenstan prezıdenti Serdar Berdimuhamedov quttyqtaý sózinde bıyl joǵary deńgeıde uıymdastyrylyp otyrǵan halyqaralyq konferentsııa men kórmeniń otandyq mamandar men sheteldik seriktester arasynda tájirıbe almasý, sondaı-aq bolashaqta keń aýqymdy yntymaqtastyq ornatý jáne ony damytý úshin mańyzy zor ekenin atap ótti.
Bıylǵy forýmǵa qatysýshylardyń kóptigimen erekshelenedi. Halyqaralyq kórmege 75-ke jýyq elden 1700-den astam ókil qatysty.
Kórme zalynda álemdik otyn-energetıka naryǵyndaǵy negizgi oıynshylar sanalatyn 130-dan astam iri kompanııa óz stendterin ornalastyrdy. Kórmede kómirsýtek shıkizatyn barlaý, óndirý, tasymaldaý jáne saqtaý júıelerin qamtamasyz etý, tereń burǵylaý, qoldanystaǵy qubyrlardy jańǵyrtý jáne jańalaryn salý, munaı men gazdy óńdeý qýattaryn arttyrý, uńǵymalardyń ónimdiligin kóterý salalaryndaǵy ónimder men qyzmetterdiń keń aýqymy usynylǵan.
Kaspıı teńizindegi jobalardy iske asyrýǵa qajetti teńizdegi barlaý jumystary men jaǵalaý ınfraqurylymyn qalyptastyrý máselelerine erekshe oryn berilgen. Sonymen qatar ekologııalyq jańashyldyqtar men jańartylatyn energııa kózderi salasyndaǵy perspektıvaly ázirlemelerge, kásiporyndardaǵy ekologııalyq qaýipsizdikti arttyrýǵa basa nazar aýdarylǵan.
Tústen keıin «Túrikmenstannyń munaıy men gazy – 2026» halyqaralyq konferentsııasy jumysyn bastady. Onda energetıkalyq naryqtardy damytýdyń jahandyq úrdisteri men yntymaqtastyq múmkindikteri, qoldanystaǵy munaı-gaz ken oryndaryn ıgerý jáne jańa ken oryndarynda óndirý kólemin ońtaılandyrý úshin sheteldik ınvestıtsııa tartý máseleleri talqylandy. Sondaı-aq Túrikmenstannyń Kaspıı teńizindegi sektoryna jatatyn teńiz ýchaskelerin ıgerý jáne jańa aýmaqtarda burǵylaý jumystaryn jandandyrý máselelerine nazar aýdaryldy.
Budan keıin halyqaralyq forým paneldik pikirtalastar formatynda jalǵasty. «Óńirlik energetıkalyq jáne ınfraqurylymdyq ózara baılanys: eksporttyq baǵyttar men uzaq merzimdi ótkizý naryqtaryn damytý» atty otyrystyń negizgi taqyryptarynyń biri ınvestıtsııa tartý jáne ınnovatsııalardy engizý boldy.
Otyrys barysynda ózekti geologııalyq derekter men bolashaǵy zor ınvestıtsııalyq jobalar da tanystyryldy. Baıandamashylardyń aıtýynsha, bul jobalardy júzege asyrý ınvestıtsııa tartýǵa jáne tehnologııalyq áriptestikti damytýǵa jańa múmkindikter ashady. Atalǵan bastamalar Túrikmenstan men kórshiles elderdiń ekonomıkalyq áleýetin nyǵaıtyp qana qoımaı, jahandyq energetıkalyq qaýipsizdikti qamtamasyz etýge jáne turaqty damýǵa yqpal etýge baǵyttalǵan.
Konferentsııanyń ekinshi kúni Kaspıı teńizindegi ınvestıtsııalar, gaz-hımııa salasyn damytý jáne bolashaq energetıka salasyna mamandar daıarlaý máseleleri boıynsha pikirtalastar ótedi.
Úshinshi kúnniń negizgi taqyryptary metan shyǵaryndylaryn qysqartý, energııa tıimdiligin arttyrý jáne energetıkanyń turaqty damýyn qamtamasyz etý bolmaq.
Buǵan deıin Qazaqstan men Túrikmenstan ekonomıkalyq yntymaqtastyqty keńeıtýge kelisken bolatyn.
Aıta ketelik Qazaqstan men Túrikmenstan medıaseriktestiktiń jańa kezeńine qadam basqan edi.
