Túrikmenstan gaz óndirý kólemin ulǵaıtady
ASTANA. KAZINFORM — 2050 jyly Túrikmenstandaǵy gaz óndirý kólemi eki esege artyp, 150 mıllıard tekshe metrge jetedi. Bul boljammen Gaz eksporttaýshy elder forýmynyń bas hatshysy Muhammed Hamel bólisti, dep habarlaıdy Turkmenportal.
— Álemdegi ekinshi iri gaz ken ornyn ıgerý jáne qubyr jelisiniń keńeıýi Túrikmenstanǵa qazirgi gaz óndirý kólemin eki esege jýyq arttyrýǵa múmkindik beredi. Gaz eksporttaýshy elder forýmynyń boljamy boıynsha, ǵasyrdyń ortasyna qaraı eldegi óndiris kólemi 150 mıllıard tekshe metrden asady, — dedi Gaz eksporttaýshy elder forýmynyń bas hatshysy Muhammed Hamel Malaızııa astanasynda ótken TEIF 2025 halyqaralyq forýmynda sóılegen sózinde.
Onyń aıtýynsha, qarqyndy damyp kele jatqan energetıkalyq ınfraqurylymnyń arqasynda Túrikmenstan Qytaı, Ortalyq Azııa, Taıaý Shyǵys elderimen tyǵyz baılanys ornatyp, bolashaqta Eýropaǵa da gaz eksporttaı alady. 2024 jyldyń qorytyndysy boıynsha eldegi gaz óndirý kólemi 77,6 mıllıard tekshe metr.
Hameldiń aıtýynsha, Gaz eksporttaýshy elder forýmy boljamdaryna sáıkes, Qytaı men Úndistan tabıǵı gazdyń eń iri tutynýshylaryna aınalady, olardyń úlesine jahandyq tutyný ósiminiń úshten birinen astamy tıesili bolady.
— 2050 jylǵa qaraı Qytaıdaǵy gaz tutyný kólemi 660 mıllıard tekshe metrden asyp, ony AQSh-tan keıingi ekinshi eń iri tutynýshy etedi. Al Úndistanda gazdyń ulttyq energetıkalyq teńgerimdegi úlesi artyp, suranys eki eseden asa ósip, shamamen 230 mıllıard tekshe metrge jetedi, — dedi ol.
Buǵan deıin Túrikmenstan eldegi eń iri ken orny «Galkynyshta» gaz óndirý kólemin arttyrýdy josparlap otyrǵany habarlanǵan.
Aıta ketelik Ózbekstan men Túrikmenstan ózara taýar aınalymyn 2 mlrd dollarǵa jetkizbek.